Një skenar i ngjashëm me djegien e “Bar Sahatit”, në Shkurt 2019, për t’i hapur rrugë ndërtimit të kullave në qendër të Tiranës, u tentua të përsëritet mesnatën e së Martës me “Sarajet e Toptanëve”, një monument i kategorisë së parë, i pozicionuar po në Unazën e vogël të kryeqytetit.
Një grup qytetarësh, përfshirë gazetarë dhe përfaqësues të shoqërisë civile, të cilët u gjendën rastësisht pranë “Sarajeve”, bënë gjithçka për të nxitur autoritetet policore dhe zjarrëfikëse që të bënin detyrën e tyre dhe të shmangnin shkatërrimin e godinës historike të Tiranës.
Trualli ku ngrihen Sarajet është parë gjithnjë si një vend ideal për ngritjen e kullave shumë-katëshe, një qasje e praktikuar gjerësisht nga kryebashkiaku Erion Veliaj.
Edhe ngjarja e kësaj të Marte, kur një “person i paidentifikuar” tentoi të digjte godinën dy-katëshe, vlerësohet nga shumë njerëz si një hap paraprak, i cili mund t’i jap udhë ngritjes së kullës së radhës, me lejen e Veliajt.
Për të penguar çdo lloj aludimi ndaj tij, kryebashkiaku i Tiranës reagoi që në orët e para të mëngjesit të sotëm.
Në një reagim në rrjete sociale, ai u shfaq si mbrojtës i vlerave kulturore e historike të qytetit.
“Dje, nën stilin e Shkollës Kosova, u tentua djegia e objektit nga dritarja e pasme që pronarët të ndalojnë shpronësimin. Në mesnatë bisedova me KM @ediramaal i cili ka autorizuar shpronësimin e përshpejtuar për Sarajet si një nga aktet e para të qeverise së re. Ta harrojnë që aty do ketë ndërtim, e ta harrojnë që aty do ketë zjarr gjer sa te behet shpronësimi. Nga sot ka nisur regjimi 24h roje!”, shkroi Veliaj në rrjete sociale.
Veliaj i referohet një ngjarjeve të rreth 20 viteve më parë, më saktësisht në Mars 2002, kur një zjarr jo-aksidental, shkrumboi pjesën më të madhe të godinës së rrënuar të shkollës “Kosova”, me qëllim përfitimin e truallit.
Por, Veliaj, shmang në mënyrë tinëzare një ngjarje që ka ndodhur jo më larg se dy vjet më parë dhe pikërisht nën dritaren e zyrës së tij.
Në Shkurt 2019, një zjarr përfshiu ish-Bar Sahatin, një lokal që gjendej fiks në qendër të Tiranës, në atë që konsiderohet “pika zero” e Shqipërisë, nën hijen e Bashkisë së Tiranës dhe Xhamisë së Et’hem Beut.
Vetëm pak ditë pas atij zjarri, në truallin ku gjendej ish-Bar Sahati, u hap një gropë gjigande, e cila u përgatit për një kullë të lartë, 77 metra.
Tashmë, ajo kullë është lartësuar dhe i ka marrë frymën edhe një prej simboleve të Tiranës, pikërisht “Kullës së Sahatit”.
Sahati i Tiranës ishte monument kulture i kategorisë së parë i miratuar në vitin 1948 dhe zona përreth ishte zonë Muzeale dhe në këtë mënyrë ishte e pamundur që të ndërhyhej për të ndërtuar.
Por në vitin 2018, Bashkia e Tiranës dhe Këshilli i Rregullimit të Territorit më procedura të përshpejtuara ia kanë hequr këtë status.
Duket se e njëjta gjë po përsëritet edhe me “Sarajet”. Megjithatë, Veliaj, në reagimin e mëngjesit të së Martës, renditi katër hapa për mbrojtjen e këtij monumenti kulture;
“Ngjarjet do rrjedhin si me poshtë: Shpronësim për 18 pronaret (jo të gjithë janë politikane piromanë) Shpallje Muze si ish Legata e Parë në Tirane dhe monument kulture, Rikonstruksion dhe hapje për publikun”, shkruan Veliaj.
Ky postim i kryebashkiakut të Tiranës duhet ruajtur me kujdes. Ndoshta e harron!
