Një ditë më parë talebanët morën nën kontroll, pa luftë Kabulin, por edhe pushtetin në Afganistan. Përparimi i talebanëve duket se kapi të papërgatitur forcat e koalicionit anti-terror, të vendosura 20 vjet më parë në Afganistan, veçanërisht ato amerikane, që kishin nisur tërheqjen.
E gjithë situata përveç frikës dhe panikut, ka ngritur shumë hipoteza mbi atë se çfarë ndodhi, por njëherazi ka krijuar edhe ironizime në rrjetet sociale.
Në Shqipëri liderët politikë, Kryeministri Edi Rama dhe pas tij kreu demokrat, Lulzim Basha, u shprehën pro strehimit në Shqipëri të afganëve. Rama u shfaq si shpëtimtar, madje si propozues i zgjidhjes, duke kujtuar edhe një Samit të Nato-s, ku kishte ngritur si shqetësim çështjen.
Ndoshta referuar deklaratave të Ramës, por edhe suportit apo mbështetjes që ai ka nga Ambasadorja Yuri Kim, Gjergj Thanasi, një prej gazetarëve shqiptarë, shkruan në rrjet:
“Të gjithë ata shqiptarë që ankohen për Juri Kim duhet të lexojnë këtë material të publikuar në faqen e Ambasadës USA në Kabul vetëm 6 ditë para rënies së Kabulit.
Shefi i shtabeve të bashkuara të forcave të armatosura të Amerikës i garanton afganët se Amerika do mbetet aleat i tyre dhe se do bashkëpunojë ngushte me Ushtrinë Kombëtare Afgane. Pasi kaluan 6 ditë nga kjo deklarate, kjo ushtria afgane nuk ekziston me”.
