Zgjedhjet lokale në Kosovë do të mbahen me 17 tetor, ndërsa partitë e mëdha kanë zyrtarizuar pothuajse të gjitha kandidaturat për shtatë komunat e mëdha.
Si këto 8 vitet e fundit, betejë e ashpër në mes të partive pritet të ketë në Prishtinë. Por, edhe Mitrovica dhe Prizreni nuk do të jenë kafshatë e lehtë për asnjë nga partitë, njofton RTK.
Kryeqytetin e Kosovës në dy mandatet e fundit e ka fituar Vetëvendosje me Shpend Ahmetin. Por, këtë herë për kryetar nxori ministrin e Shëndetësisë, e kjo ndoshta sepse Ahmeti nuk është më në Vetëvendosje. LDK-ja synon ta rikthejë komunën në qeverisje me një arkitekt, ndërsa PDK-ja do që të fitojë me ish-sekretarin e partisë.
Kandidati i ri i VV-së për kryetar në Mitrovicë, nuk është aspak i ri për qytetarët. Kryetari aktual që tani do ta kërkojë votën nën patronazhin e Kurtit, kësaj here do të ballafaqohet me një ekonomist, ish-guvernatorin e BQK-së.
Në Prizren, Vetëvendosje do të tentojë ta rifitojë komunën edhe pse ende nuk dihet me kënd. Ndërsa Gjakovën synon ta fitojë për herë të parë me një kandidate shumë të njohur për qytetarët.
Por, cilët janë emrat e zyrtarizuar dhe ata potencialë për të garuar në shtatë qytetet e Kosovës?
Betejë e ashpër dhe serioze pritet të zhvillohet në kryeqytet ku tashmë janë zyrtarizuar katër kandidatët e partive kryesore. LDK-ja do të kaniddojë me Përparim Ramën, AAK-ja me Daut Haradinajn, PDK-ja me Uran Ismailin dhe VV-ja me Arben Vitinë.
Në Mitrovicë kandidat për kryetar do të jetë vetë kryetari Agim Bahtiri, por kësaj radhe postin e synon me VV-në. Ndërsa zyrën e Bahtirit seriozisht e kërcënon PDK-ja me Bedri Hamzën. LDK-ja do të garojë me mjekun Armend Agollin.
Në Gjilan Vetëvendosje ka nxjerr të riun Alban Hysenin. E kryetari aktual i Gjilanit, Lutfi Haziri, ka vendosur që pas dy mandateve të garojë për kryetar edhe për katër vjetët e ardhshme.
Në Ferizajin e PDK-së, LDK-ja ka vendosur të që të kandidojë me një grua, është fjala për Sibel Hysenin. E kryetari aktual, Agim Aliu, do të garojë përsëri me PDK-në edhe për një mandat.
Edhe pse VV-ja qeveris me Komunën e Prizrenit, partia ende nuk ka njoftuar se kush do të jetë kandidati i këtyre zgjedhjeve. Nga VV mund të kandidojnë kryetari aktual, Mytaher Haskuka dhe Drita Millaku. Ndërsa PDK me shumë gjasë do të garojë me Shaqir Totajn, derisa LDK do të garojë me Anton Qunin.
Më të lehtë se çështjen e Prizrenit, VV-ja e ka pasur me Gjakovën. Aty do të garojë ish-kryetarja e kësaj komune, Mimoza Kusari Lila. Ajo do të synojë zyrën e kryetarit aktual nga AAK, Adrian Gjini, i cili mposhti pikërisht Kusari Lilan në zgjedhjet e fundit.
Në Pejë, LDK-ja do të garojë me kryetarin aktual, Gazmend Muhaxherin. E VV’ja pritet të garojë me Gazmir Racin. Ndërsa nga PDK’ja do të kandidojë Astrit Ademaj.
