Ferit Keta u shpall kampion Bote në Kickbox, ndërsa fitoi në duelin e zhvilluar në kalanë e Bashtovës në Rrogozhinë.
32-vjeçari mposhti pa shumë probleme në tre raunde Gulliermo Bolkland, nga 5 të mundshmet. 29-vjeçari nga Surinami, por me pasaportë holandeze, vuajti shumë duke rënë tri herë në ring.
Në raundin e parë Keta ishte dukshëm superior dhe disa goditje, 1 minutë e 15 sekonda, nga përfundimi i raundit të parë, u duk sikur mbyllën sfidën, por holandezi megjithatë rezistoi.
Keta e dominoi kundërshtarin, madje në dy raundet e para ia doli t’a hidhte në tapet, por holandezi rezistoi sa mundi, deri sa në të tretën u detyrua të dorëzohej pas goditjes fatale të Ketës.
19 sekonda përpara raundit të tretë Keta i dha një goditjen përfundimtare kundërshtarit që e hodhi në tapet për të mos u ngritur më.
Kjo fitore i dha Ferit Ketës suksesin e 15-të radhazi në ring, pa asnjë humbje.
Teksa përballë kishte një rival me eksperiencë dhe tepër të fortë si Blokland i cili numëronte 44 ndeshje, me 24 fitore dhe 16 humbje, Keta dominoi në ring, duke mos e diskutuar në asnjë moment fitoren.
Medalja e artë tashmë e Ferit Ketës, i jep Shqipërisë një titull të artë dhe një kampion bote në kickbox.