Deputeti socialist, Petro Koçi, duket se po i rikthehet një lëvizjeje të 20 viteve më parë, që u quajt katarsis në Partinë Socialiste, por që i shërbeu ish-kreut socialist Fatos Nano për të vendosur nën kontroll partinë, pas përplasjeve me grupimin e Rexhep Mejdanit dhe Ilir Metës.
Këtë rradhë Koçi duket se ka nisur kritikat me administratën, që sipas tij, po i shkaktojnë kosto Partisë Socialiste. Madje në një postim të fundit ai kërkon që të bëhen pastrime në administratë, të cilën e konsideron si një nga sfidat e mandatit të tretë.
Kritikat e Koçit janë përqëndruar kryesisht në institucionet e Fierit dhe janë interpretuar në forma të ndryshme, herë si një interes në favor të një grupimi brenda PS, pra si luftë e brendshme, dhe herë si një tentativë, për të marrë nën kontroll strukturat partiake në qark, të cilat deri diku kontrollohen nga Kryebashkiaku Subashi.
“Ta heqim partinë nga duart e Maliqëve të administratës”, shkruan Koçi, duke shtuar se “një nga sfidat e këtij mandati të ri është performanca e administratës dhe bashkë me të lufta ndaj korrupsionit”.
“Para më pak se një muaj i dhashë zë politik një fenomeni prepotent në Fier, zgjatjes së duarve të botës së krimit në financat publike. Bëra një deklaratë të cilës nuk i heq asnjë presje. Hodha në publik një britmë të vetë publikut.
U munduan të ma kompromentonin. Disa u vërsulën ta përkthenin në larje hesapesh, të tjerë në çështje personale, të tjerë si përpjekje për kompromis të pisët.
U përshfaqën disa palë politiko-mediatike me interesa të caktuara financiare në treg. Sigurisht po ti përkisja ndonjë interesi të tillë do isha një gojëmbyllur i rëndomtë.
Palët nga nxitimi nxorën në shesh një sërë aferash me interes për agjensite e zbatimit te ligjit. Edhe per vete SPAK un me të cilin pata nderin të kontaktoj.
Cuditërisht administrata e shumë agjesive shtetërore që veprojnë në Fier reagoi politikisht kundër këtij denoncimi. U bënë përpjekje që te futej ne krize marredhenia organizative ne PS. Fenomeni që denoncova nuk po frenohet akoma. Përkundrazi. Por gjithesesi nuk ka vend për pesimizëm”, shkruan Koçi.
