Dalin fotografi e litarëve të improvizuar nga dy të dënuarit Arbër Çekaj dhe Fatmir Pjetri, të cilët u përpoqën të arratiseshin nga burgu të dielën.
Çekaj, i dënuar për trafik droge, dhe Pjetri, për një seri grabitjesh me armë, u kapën pasi zbritën me çarçafë nga zona e ajrosjes së të burgosurve te pjesa e administratës.
Fotografitë e siguruara eksluzivisht nga Euroneës Albania tregojnë se ata përdorën një litar të improvizuar nga të paktën katër çarçafë të ndryshëm si dhe një çengel të cilin ata e përdorën për t’u kapur nga tarraca.
Burime i thanë Euroneës Albania se dy të dënuarit shfrytëzuan momentin kur rreth orës 15:00 të dielën gardianët u shpërqendruan nga tentativa për vetëvrasje e një të paraburgosuri tjetër.
Ata janë hedhur nga zona e ajrimit tek ajo ku qëndron administrata dhe që është jashtë perimetrit të sigurisë së lartë.
Shërbimi i Kontrollit të Brendshëm në Sistemin e Burgjeve ka nisur hetimet për mënyrën se si dy të dënuarit kanë improvizuar litarin dhe çengelin.
Dyshohet se një gardian mund t’i ketë ndihmuar ata për materialet. Hetuesit ndërkohë kanë marrë në pyetje stafin teksa Çekaj, Pjetri dhe i paraburgosuri tjetër janë vendosur në izolim për 90 ditë.
Ndaj tyre është ngritur akuza e përpjekjes për arratisje dhe goditje për shkak të detyrës. Autoritetet ka gjasa të kërkojnë zhvendosjen nën regjimin me mbikëqyrje të shtuar – njohur si 41 bis.
