Dukati është një prej zonave të nxehta lidhur me situatën e zjarreve në vend. Pavarësisht se Ministria e Mbrojtjes pasditen e djeshme deklaronte fikjen e zjarreve, në mbrëmje situata precipitoi dhe banorët e zonës, u detyruan të japin alarmin. Zyrtarisht Ministria e Mbrojtjes tha në orët e vona të së shtunës se zjarret u aktivizuan dhe u përhapën për shkak të erërave të forta.
Por çfarë ndodhi gjatë natës në Dukat?
Faxnews ka trasmetuar pamje dhe dëshmi nga banorë të zonës, që ndihen të kërcënuar nga zjarri edhe njëherë tjetër.
Ata thonë se shteti nuk pyet për ta dhe se janë me fat që zjarri nuk ka filluar gjatë natës, për shkak se nuk dihet çfarë do t’i ndodhte.
“Kemi frikë shumë. Kam dy fëmijë po më flenë në makinë.Shyqyr që nuk ishte natën se ku i dihet ça do na ndodhte. Po ku pyet shteti për ne. Janë njerëzit që po e fikin“, tregojnë ato.
Mëngjesin e kësaj të diele zjarri vijon të djegë Malin e Dukatit. Tymi ka mbuluar zonën dhe zjarrfikësit vazhdojnë të luftojnë me flakët.
Mësohet se era ka favorizuar përhapjen me shpejtësi të flakëve, për shuarjen e të cilave këtë mëngjes është futur në punë dhe helikopteri.
Rikujtojmë se vatra e zjarrit në Dukat ishte shuar, por ditën e djeshme ajo u riaktivizua sërish, me autoritetet përgjegjëse që dyshojnë fort se riaktivizimi ka qenë i qëllimshëm.
