Vatër e re zjarri në Zhupan të Fierit, dyshohet për zjarrvënie të qëllimshme

Sapo u duk sikur vatrat e zjarrit ne Gjorgoz e Cakran po vihej nën kontroll, një tjetër vatër u shfaq në kodrat me ullinj në Zhupan.

Të favorizuara nga era, terreni i vështirë e temperaturat e larta, në pak minuta flakët përfshinë kodrat me ullinj të fshatrave periferik të Fierit, Zhupan, Radostinë e Vadhizë.

Nën flakë janë 100 rrënjë ullinj, ndërsa tymi ka mbuluar fshatrat ku iu rrezikohen banesat e vihet re nga qyteti në Fier, sesi përhapen retë e zeza të tymit.

Mes flakëve po luftojnë punëtoret zjarrfikës të Fierit, policia bashkiake e banorë, por e pamundur të merren nën kontroll flakët. Banorët shprehen se prej 2 vitesh nuk kishte rënë zjarr në këto kodra, ndaj dyshojnë se është i qëllimshëm.

Nga vatrat e zjarrit rrezikojnë edhe banesat pranë, pasi zjarri përhapet me shpejtësi, por deri tani nuk ka evakuime të tyre. Rreziku mbetet në këto fshatra, pasi nën flakë ndodhen edhe shtyllat e tensionit të lartë, ku rrezikon edhe jetën e banorëve.

Lufta me flakët vijon ende, e ndërsa si qark këtë pasdite një vatër tjetër është regjistruar edhe në Bashkinë Mallakastër , në Çorrush.

Në vendngjarje ndodhen forcat zjarrfikëse, por deri më tani nuk raportohen dëme në banesa. Në vendngjarje vijon të jetë policia e zjarrfikës, për të mbajtur nën kontroll flakët e mos të rrezikojnë banesat, pasi ndërhyrja nga ajri mungon.