Në bazë të një kallëzimi të bërë disa ditë më parë nga Kontrolli i Lartë i Shtetit, Prokuroria e Posaçme është duke kryer verifikime për Ferdinand Tarazhin dhe 4 zyrtarë të tjerë në Ministrinë e Brendshme.
Tarazhi mban detyrën e kryetarit të komisionit të Monitorimit në Ministrinë e Brendshme dhe u kallëzua për shkelje në disa procedura tenderimi
Duke iu referuar njoftimit zyrtar të KLSH, nga auditimi kanë rezultuar mospërputhje dhe devijime ligjore në procedurat e prokurimit publik, të cilat kanë cenuar barazinë e pjesëmarrësve dhe operatorëve ekonomik në këtë procedure.
Gjithashtu është vërejtur rritje e paargumentuar e vlerës së kostove të ndërtimit dhe kostove të projektimit në procedurën e prokurimit me objekt “Studim, Projektim i disa objekteve të Policisë së Shtetit”.
Konkretisht bëhet fjalë për punimet që janë kryer në Drejtorinë Vendore të Policisë së Vlorës, Komisariati i Policisë Nr.4 Tiranë, Komisariati i Policisë Pogradec, Komisariati i Policisë Mirditë.
Zyrtarët u kallëzuan në SPAK për veprën penale të “Shkelja e barazisë së pjesëmarrësve në tenderë apo ankande publike”. /Syri TV/