Ministri i Mbrojtje,s Niko Peleshi, ka pranuar pas mbledhjes në Komitetin e Mbrojtjes Civile, se Shqipëria ka vetëm një helikopter në dispozicion për shuarjen e zjarreve me përmasa të mëdha si ai në gadishullin e Karaburunit, dhe e vetmja zgjidhje është që të kërkojnë ndihmë në sektorin privat jashtë vendit.
Peleshi tha se në momentet që flasim edhe vendet fqinje janë në një situatë të pafavorshme, dhe për këtë shkak ndihma prej tyre ka pak mundësi që të realizohet.
Ministri nuk ishte në gjendje të jepte një afat kohor se kur mund të bëhet e mundur fikja e zjarrit në Karaburun, që rrezikoi dhe dhe bazën ushtarake të Pashalimanit.
“Lajmi jo shumë i mirë është që nuk është se ka shumë kapacitete në dispozicion nga vendet fqinj sepse janë përfshirë në emergjenca shumë më të rënda se tonat, kam parasysh Turqinë, Greqinë, Italinë, Kroacinë ku sot kam folur me Ministren e Mbrojtjes së Kroacisë para dy orësh, kam kërkuar mbështetjen me hidroplan, nuk kanë patur mundësi të na pergjigjen menjëherë por gjithësesi jemi në rradhë për t’i përdorur sapo të lirohet një kapacitet.
Do të përdorim edhe neser gjatë ditës helikopterë nga operatorë të tjerë veç mjeteve që kemi ne në dispozicion dhe shprësojmë që gjatë ditës së nesërme besoj do të jenë tre helikopterë në përdorim deri pasditen e vonë por nuk është se helikopterët janë zgjidhja përfundimtare. Së pari që në orët e para të mëngjesit, komandanti bashkë me trupat e tij ne 4:00 të mëngjesit do të niset drejt zonës së pyllit mbi Dukat, do të ecin 4-5 orë aty ku është vatra dhe për të parë se cilat metoda janë më të përshtatshme për t’u aplikuar për shmangien e përhapjes së zjarrit drejt Parkut të Llogarasë, që nuk duhet të lëjohet me asnjë mënyrë.
Ne kemi 1 helikopter me kapacitet 2000 litra ujë i cili vlen në këtë situatë ndërkohë siç e thashë nesër edhe me procedurën që po bëjmë për të kontraktuar operatorë të tjerë gjatë gjithë ditës do të kemi 3 helikoptërë që do te punojnë”, tha Peleshi.
Tre vjet më parë ministrja e Mbrojtjes, Olta Xhaçka, në situatën e zjarreve, fliste në numrin shumës për përdorimin e helikopterëve Cougar.
“Ministrja e Mbrojtjes, Olta Xhaçka, deklaroi se Helikopterët Cougar të Forcës Ajrore u pajisën me kova të reja për shuarjen e zjarreve, për të ndihmuar zjarrfikësit dhe efektivët në terren.
Në kuadër të masave për shuarjen e zjarreve në stinën e nxehtë të verës, Ministria e Mbrojtjes ka marrë masa që Helikopterët Cougar të jenë të aftë në shuarjen e zjarreve, për të ndihmuar zjarrfikësit dhe efektivët në terren.
Madje, për futjen në përdorim të pajisjeve të reja, dje u krye një demonstrim në liqenin e Farkës, i cili u ndoq nga afër nga ministrja e Xhaçka, shoqëruar më pas me një mëngjes pune për emergjencat civile me prefektët e qarqeve, strukturat e Forcave të Armatosura që angazhohen në këto situate si edhe deputetët e Komisionit të Sigurisë Kombëtare”, raportohej 3 vjet më parë, lidhur me këto helikopterë.
Pas deklaratës së Peleshit, pyetja që lind është se ku kanë përfunduar helikopterët Cougar, përsa kohë ai pohon se ka vetëm 1 të tillë.
Gjatë qeverisjes së PD, pra deri në 2013, u morën 3 helikopterë Cougar, më pas kur ministre e Mbrojtjes ishte Mimi Kodheli, erdhi edhe një tjetër helikopter Cougar, duke e çuar numrin në 4, të cilët sot do të mund të përdoreshin për të përballuar situatën e zjarreve.