Mbrëmjen e djeshme portali “Albanian Post”, i drejtuar nga gazetari Baton Haxhiu, publikoi lajmin se në mesin e 7 vilave që janë grabitur së fundi në Gjirin e Lalëzit është dhe ajo e kreut të SPAK, Arben Kraja.
Por kreu i SPAK në një reagim të tij e ka mohuar lajmin, duke e cilësuar të pavërtetë. Madje Kraja shprehet se lajme të tilla “fake” bëhen për të goditur punën e institucionit që ai drejton.
“Nuk më është vjedhur banesa as këto ditë dhe as më parë. Garantoj publikun se puna e SPAK nuk intimidohet nga “fake news”. Lajmi është i sajuar për të goditur integritetin e institucionit që unë drejtoj”, u shpreh Kraja, në një reagim për mediat.
Ai shtoi se 2 javë më parë, në kompleksin Lura, ishin vjedhur disa banesa, por pre e vjedhjeve nuk kishte rënë banesa e tij.
