Autoriteti i Aviacionit Civil, sipas një denoncimi të mbërritur në Boldneës.al, ka çelur një tender me fond limit 7778033 lekë të reja, pa TVSH, i cili do të përdoret për organizimin e një eventi, në kuadrin e mbledhjes së 70-të të Drejtorëve të Aviacionit Civil të ECAC.
Bazuar në këtë denoncim, eventi do të zgjasë 3 ditë dhe përfshin, darkë gala, shëtitje me anije në Vlorë dhe ishuj, darkën e mirëseardhjes, e cila do të shoqërohet me kuartet harqesh.
Tenderi në fjalë mban numrin e referencës REF-00778-07-12-2021.
Pak muaj më parë, Aviacioni Civil u përfshi në një përplasje mes punonjësve dhe autoriteteve shtetërore, pasi punonjësit organizuan një grevë, sepse kërkonin pagat e tyre. E ndërsa greva u mbyll dhunshëm nga Qeveria, e cila arrestoi edhe disa nga organizatorët, duket se sot drejtuesit e Aviacionit Civil, një institucion i denoncuar publikisht për nepotizmin në organikë dhe pagat e larta, ka luksin që të shpënzojë plot 77 milion lekë të vjetra për 3 ditë, për evente që ndoshta nuk kanë asnjë vlerë, përveç shpërdorimit të fondeve.
Denoncuesi thotë se tenderi është i paracaktuar dhe gjithçka është fiktive. Aviacioni Civil me drejtuese Edlira Krajën, ka përcaktuar vetë menunë që deshiron, ku spikasin ushqimet e përzgjedhura, nuk mungon shërbim transporti me anije nga Vlora në ishullin e Sazanit, muzike live, drekë ne anije etj.
E çuditshme është fakti se në një kohë kur SPAK po heton disa nga tenderat, ndërkohë që disa nga institucionet, ndoshta edhe nga frika, kanë anuluar procedurat e tenderave të njoftuar, drejtuesit e Aviacionit Civil, kanë luksin që të organizojnë një tender disa miliona lekë, për një event që më shumë i ngjan një qoke, se sa një organizimi prej të cilit mund të përfitojë vendi.