Luiza Gega është e vetmja sportiste shqiptare që arriti të kualifikohet në finale të disiplinës ku mori pjesë.
32-vjeçarja u rendit e pesta me kohën 9:23.85, në garën e 3000 metrave me pengesa. Gega është e vetmja sportiste që mban gjallë shpresat e Shqipërisë për një vend në podium.
Përmes një postimi në rrjetet sociale, Gega tregon emocionet e kësaj gare.
Postimi i Luiza Gegës
“Thjesht një vajzë në finale të LOJËRAVE OLIMPIKE Tokyo2020. Dhe ku, për herë të parë sporti i atletikës shqiptare shkon në një finale olimpike. Uroj shumë ta kem këmbën e mbarë!
Sa shumë do të thotë kjo për mua, doja të kisha një kujtim të bukur nga këto lojëra dhe ia dola. Jam lodhur shumë për të qenë këtu, por kur ti e realizon atë që do, çdo lodhje ia vlen dhe emocionet që merr nuk mund t’i blesh me asgjë.
Faleminderit pa masë të gjithëve, për urimet që më keni dërguar. Dhe faleminderit nga zemra të gjithëve atyre që më mbështetën në rrugëtimin tim dhe besuan tek unë!”.