Situata e rënduar në vend për sa i përket zjarreve, ndërkohë që ministri i Mbrojtjes Niko Peleshi bën propagandë duke u shprehur se “po punohet intensivisht për neutralizimin e tyre”.
Zjarret në vend kanë shkrumbuar mijëra hektarë pyje e kullota, teksa në disa zona situata ka dalë jashtë kontrollit. Rasti më skandaloz është ai i Fierit, ku djegia e mbetjeve që po vijon prej 5 ditësh ka sjellë një ndotje të paprecedentë me qytetin e pushtuar nga tymi. Në Vlorë, janë aktive disa vatra, ku flakët vijojnë të djegin bimësi, ndërsa zjarrfikësit raportohet se po punojnë me mjete rrethanore për shuarjen e tyre.
Pafuqinë e autoriteteve në përballjen me zjarrin e konfirmoi një ditë më parë edhe kreu i zjarrfikëses së Vlorës, i cili pranoi se nuk ka burime njerëzore për të mbuluar gjithë territorin.
Këto orë të mbrëmjes, alarm është krijuar edhe në Përmet, teksa flakët që kanë djegur hektarë me bimësi, po i afrohen qytetit.
Zjarre të tjera kanë rënë në Mazhic të Bulqizës, Delvinë, Shikaj të Kukësit, e Shetaj të Durrësit.
Tetë janë vatrat aktive në vend.
Nisur nga situata e rënduar, KLSH ka nisur kontrollet në terren ndaj strukturave që menaxhojnë shuarjen e zjarreve.
E teksa flakët vijojnë prej ditësh të nxjerrin në pah pafuqinë e autoriteteve, ministri Peleshi gjen kohë të bëjë propagandë duke u shprehur përmes një postimi në FB, se “po punojnë intensivisht për neutralizimin e tyre”.
DENONCO