Ambasadorja amerikane në Tiranë kërkon përjashtimin nga grupi parlamentar i PD të ish- kryeministrit Sali Berisha.
Në një deklaratë pas takimit me kreun e PD Lulzim Basha, Kim bëri apel që Partia Demokratike të shkëputet nga ish-kryeministri.
“Është tragjike për një parti që të hajë barë për fatin e një njeriu”, u shpreh Kim duke ju referuar parrullës së Enver Hoxhës se ”bar do të hajmë dhe marksizëm – leninizmin nuk do e tradhëtojmë”.
“Kryetarët e partive do të futen në Kuvend dhe është e rëndësishme që të mund të shoqërohen, Nga deputetë që e meritojnë përfaqësimin e Shqipërisë. Do të jetë e rëndësishme që Partia Demokratike të mendojë për këtë çështje. Sikur e kam thënë edhe më parë, PD ka ruajtur një rol të pa zëvendësueshëm për ta nxjerrë këtë vend nga diktatura nga komunizmi. Do të ishte ironi historike dhe tragjike nëse partia do duhet të hante barë, për hatër të një deputeti të saj. Shpresa jonë është që partitë do të lëvizin para, se ky vend do të lëvizi përpara. E ardhmja po na pret. Bashkëpunimi ynë do vazhdojë përpara. Ka vendime të vështira përpara për të gjithë. Shpresoj që njerëzit të kenë mundësi të shplodhen gjatë gushtit dhe të rikthehen të ripërtërirë”, tha Yuri Kim.
Sali Berisha u shpall non grata nga SHBA-të për akuzën e korrupsionit. Ai e ka paditur në një gjykatë në Francë Sekretarin Amerikan të Shtetit lidhur me vendimin.
