Aleanca për Mbrojtjen e Teatrit iu drejtua sot SPAK për të dorëzuar kallëzimin penal ndaj Ministrisë së Kulturës për veprën penale “shpërdorim detyre” dhe pengim në ekzekutimin e një vendimi gjykate.
Përfaqësuesja ligjore Adriana Kalaja paralajmëroi se ky kallzim penal është vetëm fillimi pasi do të vijojë me kallëzime të tjera, deri dhe prokurorëve dhe kryeprokurorit të SPAK, Arben Kraja.
Jo vetëm, Kalaja thotë se shumë shpejt do t’i drejtohet senatit amerikan për ambasadoren Yuri Kim.
“Shumë shpejt do ti drejtohemi senatit amerikan për të gjithë veprimet e paligjshme që bën ambasadorja Kim dhe nuk reagon sa herë kryeministri e kryetari i bashkisë shkelin ligjin, por reagon gjithmonë në krah të tyre, është bërë palë me krimin e njerëzit që shkelin ligjin e Kushtetutën” tha Kalaja sot paradite në një prononcim për median tek dera e SPAK.
Aleanca për Mbrojtjen e Teatrit shprehet e vendosur se nuk do të tërhiqet në betejën e saj për Teatrin Kombëtar të shembur më 17 maj 2019.
Ata akuzojnë kreun e SPAK dhe prokurorët se nuk po hetojnë paditë që kanë depozituar dhe nuk çojnë në gjykim personat përgjegjës për prishjen e teatrit.
“Unë nuk di se çfarë pret SPAK të çojë për gjykim ata kriminelë që erdhën për të vrarë disa protestues paqësor. Çfarë pret SPAK kur pa se gjysma e policisë prezentë ishte pa numër identifikimi. Të çojë para gjykimit personat pëgjegjës kur prishja e Teatrit u bë në një kohë që çështja e teatrit ishte në Gjykatë Kushtetuese, KLSH kishte marrë vendim për pezullim të prishjes së teatrit. Ka shumë shkelje. Ne e quajmë shpërdorim detyre nga ana e SPAK që merret me gjëra të vogla dhe jo me paditë tona që datojnë 31 dhjetor 2019”
Shumë shpejt do ju bëjmë me dije dhe kallëzime penale që do bëjmë prokurorëve dhe kryetarit të SPAK që me mos reagimin e tyre qartësisht tregojnë se janë bërë palë me ata që shkelin ligjin” tha Kalaja.