Partia Demokratike mbledh të dielën Këshillin Kombëtar ku pritet të votohet për Kryesinë e re dhe Sekretariatin, përfshi edhe postin e Sekretarit të Përgjithshëm.
Burime nga PD shprehen se gjithashtu mbledhja e parë e Këshillit Kombëtar pritet të zgjedhë edhe drejtuesin e ri të këtij forumi, pozicion mbahet aktualisht nga ish-Presidenti Bujar Nishani.
Nuk dihet nëse Nishani do të vijojë të jetë në këtë pozicion honorifik, apo Këshilli do të drejtohet nga një tjetër emër.
Pak javë më parë demokratët mbajtën Kuvendin Kombëtar ku u miratua një paketë e propozuar nga kreu i PD-së, Lulzim Basha, lidhur me ndryshimet në statutin e partisë, sikundër zgjodhi edhe anëtarët e rinj të Këshillit Kombëtar.
Me zgjedhjen e Kryesisë, nënkryetarëve dhe Sekretariatit, PD përmbyll procesin e zgjedhjeve të brendshme në parti.
