Pesë persona janë arrestuar dhe një i gjashtë është shpallur në kërkim lidhur me aksionin anti-drogë të zhvilluar një ditë më parë në kryeqytet.
Në pranga është vënë dhe drejtuesi i automjetit tip “Benz”, që nuk iu bind thirrjes së efektivëve për të ndaluar. Pamjet e publikuara nga BoldNews kur ai iu largua policisë, pas thirrjes së këtyre të fundit për të ndaluar – ku nuk mungoi fjaloi banal i përdorur nga policët – u kthyen në virale. Pas kësaj, efektivë të policisë iu sulën një gazetari, duke e shtrirë përtokë dhe duke i marrë celularin, sepse ky i fundit po filmonte.
Në një njoftim zyrtar këtë të Mërkurë, Policia sqaron se drejtuesi i automjetit tip “Benz” Gazmend Cani nuk kishte lidhje me grupin që merrej me shpërndarje kokaine. Ndalimi i tij është bërë me akuzën “Kundërshtimi i punonjësit të policisë së rendit publik”. Ndaj tij, efektivët përdorën një fjalor rrugësh duke i kërkuar të dilte nga mjeti me thirrjet: … Hape derën policia o k*r… Hape derën o byt*q***…
Nga ana tjetër, Prokuroria e Tiranës njoftoi dje se ka nisur një hetim “mbi veprimet e kryera nga punonjësit e policisë për të përcaktuar ligjshmërinë e veprimeve të tyre”. Sjellja agresive e Policisë është dënuar gjegjësisht nga opinioni publik.
Të arrestuarit për drogë
Të arrestuarit për veprën penale “Prodhimi dhe shitja e narkotikëve”, kryer në bashkëpunim, janë Gentian Kore, 47 vjeç, Taulant Çoku, 34 vjeç, Altin Gega, 28 vjeç dhe Erjon Prengaj, 32 vjeç.
“Specialistët për Hetimin e Narkotikëve, në bashkëpunim me Sektorin e Forcës së Posaçme Operacionale, në bazë të informacioneve të marra se disa shtetas, në bashkëpunim me njëri-tjetrin merreshin me shpërndarjen e lëndëve narkotike kokainë në zonën e Xhamllikut, kanë zhvilluar operacionin e koduar ‘Xhamlliku’, në kuadër të të cilit bënë arrestimin në flagrancë të shtetasve (të mësipërm) për veprën penale ‘Prodhimi dhe shitja e narkotikëve’ kryer në bashkëpunim. Si dhe u shpall në kërkim shtetasi E(E) alias P(S)., 33 vjeç, i dyshuar si bashkëpunëtor në ngjarje”, njoftoi policia.
“Shtetasit e lartpërmendur janë konstatuar nga shërbimet e Policisë, në rrugën ‘Kujtim Laro’, në biznesin e Gentian Kores, ku dyshohet se kryenin veprimtarinë e kundërligjshme të shpërndarjes së lëndëve narkotike. Të katërt këta shtetas, sapo kanë parë shërbimet e Policisë kanë tentuar të largohen me vrap, por janë neutralizuar dhe prangosur nga Policia. Gjatë largimit, ata kanë fshehur lëndë narkotike kokainë, e cila u sekuestrua në cilësinë e provës materiale”, shtuan të njëjtat burime.
Drejtuesi i Benz-it
Nga ana tjetër, 26-vjeçari Gazmend Cani u arrestua për veprën penale “Kundërshtimi i punonjësit të policisë së rendit publik”.
“Në vijim të veprimeve, njoftoi policia, u bë arrestimi në flagrancë për veprën penale ‘Kundërshtimi i punonjësve të policisë’, i 26-vjeçarit, pasi ka kundërshtuar urdhrin e punonjësve të Policisë për të ndaluar për verifikim e tij dhe është larguar me shpejtësi duke rrezikuar jetën e punonjësve të Policisë”.
Blutë e Tiranës sqaruan dje se pas incidentin me të riun, “pas disa minuta ndjekjeje nga ana e Policisë, është bërë i mundur bllokimi i mjetit dhe ndalimi i drejtuesit të tij”.
Burime pranë grupit hetimor thanë se Cani ka deklaruar para uniformave blu se iku nga vendngjarja pasi u frikësua.
Lexo edhe:
