Xhudistja Nora Gjakova i siguron Kosovës medaljen e dytë të artë në këto Lojëra Olimpike.
Nora Gjakova mundi në finalen e xhudos për peshën deri në 57 kg francezen Sarah-Léonie Cysique. Kjo e fundit mori karton të kuq.
“Gjatë gjithë luftës, u tregova e duruar dhe e vazhdova sa më shumë, sepse ishte e përgatitur. Jam shumë e gëzuar që e fitova atë ndeshje”, tha Gjakova pas fitores historike.
“Kurse për finalen, nuk kisha dëshirë që të përfundonte në atë mënyrë, me skualifikim për xhudisten e Francës, por prapëseprapë fitorja është e rëndësishme. Shumë e vështirë, jo vetëm për mua. Të gjithë kanë punuar për medaljen olimpike, trajneri, familja, klubi. Jam falënderuese ndaj secilit që ka harxhuar kohë për mua dhe ia kushtoj të gjithëve që më kanë ndihmuar”, shtoi ajo.
Triumfi i Nora Gjakovës sjell për Kosovën medaljen e dytë të këtyre Lojërave Olimpike dhe të tretën në histori. Të shtunën, xhudistja Distria Krasniqi fitoi medaljen e artë po në xhudo, në kategorinë deri në 48 kilogramë. Në Lojërat Olimpike në Rio, më 2016, edhe xhudistja Majlinda Kelmendi fitoi medaljen e artë.