Koçi dhe Braçe si “kanerina” në kafazin e Ramës

Nga Boldnews.al

Njëri është shumë i madh me post, numri dy i qeverisë, nënkryeministri Erion Braçe. Në këto tre vitet e fundit më shumë e ka drejtuar ai mbledhjet e qeverisë sesa vetë Rama. Për më shumë shfaqet kudo me një “letër në xhep” ku thuhet: “Kryeministri Edi Rama, në mungesë dhe me porosi zëvendëskryeministri Erion Braçe”. Pra ai është “kryeministër de fakto”, ose të paktën kështu shpreson, sepse thonë se askush nuk ia vërshëllen sa herë flet e shkruan.

Më së fundi Braçe ka nisur të mbushë facebookun e tij me postime, pas një heshtje të gjatë, që nga momenti i arrestimit të kryebashkiakut të Lushnjes Fatos Tushe dhe daljes në përgjime të një personazhi “B”, që SPAK as nuk pati guxim që ta identifikonte. Braçe ankohet se Bashkia Tiranë po ngren vinçe për “gjoja punime” pa asnjë kriter sigurie dhe pak metra larg pallateve. E thënë kjo nga Braçe tingëllon aq keq, pasi po ankohet numri dy i qeverisë, por kujt i ankohet? Qytetarëve që nuk kanë fuqi?

Por Braçja duhet, jo se është një zë i fuqishëm që zgjidh punë dhe ka pushtet, por sa për imazh. I duhet Ramës dhe konceptit të Rilindjes për të treguar se edhe pushtetarët janë njësoj si të tjerët, që jetojnë këtu mes betonit të Veliajt, apo smogut të katrahurës urbane dhe të gjithë janë si ‘ne’, që mezi mbyllim fundin e muajit. I duhet Braçe edhe për ta pasur sa për imazh si një njeri që e nis me ankesa për pasigurinë në qytet dhe e mbyll me foto bujqish në arat e Divjakës.

Po na del edhe një tjetër “Braçe” kohët e fundit, vetëm emri ndryshon dhe quhet Koçi… Po po, Petro Koçi po bëhet “zë qytetar” duke denocuar krimin e organizuar që sipas tij ka kapur financat publike në Fier. I foli goja para mendjes dhe sa për imazh, Koçi shkoi sot për të dëshmuar para prokurorëve të SPAK. Afërsisht një orë qëndroi aty, por ngase mësohet as ka përmenduar emra, e as nuk mund të pritet ndonjë “zbulim i madh” prej Koçit.

LEXO EDHE  Përplasja Basha-Berisha/ Mark Marku: Ja kë duhet të zgjedhin demokratët

Thjasht ai u ul në facebook dhe u kujtua tani pas zgjedhjeve se në Fier krimi i organizuar po merrte tendera publik, pra taksat e qytetarëve. Këtë ai e kishte vërejtur sidomos gjatë fushatës elektorale ku edhe ishte kandidat për deputet, por asokohe Koçi nuk kishte “zë”, tashmë i erdhi “goja memecit”, pasi ai u bë deputet dhe lideri i tyre shpirtëror Edi Rama rrëmbyen mandatin e tretë.

Thjesht disa personazhe janë në rolin e tyre që kënaqin haluçinacionet e kryeministrit i cili kërkon të injektojë në publik idenë se luftëk kundër korrupsionit e ka seriozisht dhe se ka vënë të tijët, për të denocuar po të tijët…

Ndërsa njeriu “parimor” Braçe ka hedhur firmën si nënkryeministër në vendime të ndryshme të qeverisë që dukshëm bien ndesh me interesat qytetare dhe në disa raste të bëra publike favorizojnë oligarkinë. Ama Braçen e kemi kur sheh ndonjë dumdum që të buçet veshët në rrugë, apo hapet ndonjë gropë pallati afër apartamentit të Braçes, aty nuk duron dhe quhet “zë qytetar”. Në fakt shumë individë që kërkojnë të luajnë rolin e parimorit dhe të ndershmëve janë thjesht kanerina në “kafazin e Ramës” dhe sa herë ai ua kërkon, nisin të këndojnë…!