Një person u plagos ditën e sotme në zonën e Dukagjinit në Malësinë e Madhe, ndërsa nga të dhënat e fundit raportohet se ai ishte i shpallur në kërkim për vrasje në rrethana cilësuese.
Bëhet fjalë për shtetasin Ardian Narkaj, banues në Koplik, një person me rrezikshmëri të lartë dhe i shpallur në kërkim.
Narkaj rezulton i dënuar me 21 vite burg për një vrasje të dyfishtë, ndërsa mësohet se ai ka mbetur i plagosur gjatë ndjekjes së policisë dhe forcat RENEA. Nga raportimet mësohet se një grup i forcave RENEA kishte shkuar në Shkodër mbrëmjen e djeshme, në mbështetje të policisë lokale, për arrestimin e një personi me rrezikshmëri të lartë.
Zyrtarisht policia nuk ka dhënë detaje mbi ngjarjen, deri në momentin e publikimit të këtyre inforacioneve, ndërsa nuk dihen rrethanat e plagosjes së 52-vjeçarit, pra nëse ka pasur një shkëmbim zjarri apo jo.
Nga raportimet mësohet se ai u transportua fillimisht drejt spitalit të Shkodrës nga policia, dhe më pas me helikopter u soll në spitalin e Traumës në Tiranë, për shkak të gjendjes së rëndë shëndetësore, të shkaktuar nga plaga me armë zjarri.
Raportohet se Narkaj ka marrë 3 plumba, një në gjoks, një në parakrah dhe një tjetër në kofshë. E ndërsa nuk dihet se kush ka qëlluar ndaj 52-vjeçarit, Policia pritet të japë informacione zyrtare lidhur me operacionin, por edhe mbi atë se çfarë ka ndodhur.
Narkaj akuzohet për një vrasje të ndodhur në vitin 2008, e ndodhur në fshatin Bratosh të Malësisë së Madhe, ku viktimë mbetën Gjergj Shota dhe Ton Ulaj.
Sipas informacioneve të bëra publike asokohe, ngjarja ndodhi pas një konflikti të çastit mes autorit dhe viktimave.
DENONCO