Policia e Fierit ka bërë të mundur parandalimin e një ngjarjeje e cila mund të kishte përfunduar në tragjedi.
Siç bëhet me dije nga njoftimi zyrtar i policisë, babë e bir Fakim dhe Petrit Zyka, kanë patur një konflikt me një fqinjin e tyre në fshatin Mbrostar Ura. Më pas situata ka agravuar deri në përdorimin e armëve ku 30 vjeçari Zyka ka marrë kallashnikovin dhe ka qëlluar në ajër duke kërcënuar fqinjin e tij.
Policia ka mbërritur në vendngjarje dhe ka arrestuar babë e bir.
Njoftimi i plotë i Policisë:
Fier / Punonjësit e Policisë kanë bërë të mundur neutralizimin dhe prangosjen e shtetasit Fakim (Ilvan) Zyka., i cili pas një konflikti për motive të dobëta me fqinjin e tij, shtetasin M. K., 55 vjeç, e ka kanosur atë duke gjuajtur në ajër me armë zjarri automatik, nga oborri i banesës së tij.
Në vijim të veprimeve, nga specialistët për Hetimin e Krimeve në Komisariatin e Policisë Fier u arrestua në flagrancë shtetasi Fakim(Ilvan) Zyka., 30 vjeç, banues në Mbrostar Ura, Fier, si dhe babai i tij, shtetasit Petrit Zyka, 59 vjeç, banues në Mbrostar Ura, Fier, i cili mbante pa leje një armë zjarri pistoletë.
U sekuestruan në cilësinë e provës materiale një armë zjarri automatik, një pistoletë dhe një krehër me 18 fishekë. Materialet do i kalojnë Prokurorisë pranë Gjykatës së Shkallës së Parë Fier, për veprat penale “Mbajtja pa leje e armëve dhe municionit luftarak” dhe “Kanosja”.