VV thirrje Ramës: Ndal punimet në By-Pass e Gjirokastrës, po rrënon trashëgiminë

Lëvizja Vetëvendosje, dega Shqipëri, i ka drejtuar një thirrje autoriteteve që të ndalin punimet për By-Pass n Gjirokastër, pasi rrezikohet trashëgimia.

Lëvizja VETËVENDOSJE! në Shqipëri i bën thirrje Qeverisë që të ndalë vrullin e mbrapshtë për të rrënuar trashëgiminë kulturore të vendit.

VV thekson se nuk mund të rrezikojmë nxjerrjen e Gjirokastrës nga UNESCO, prandaj ndërtimi i By-Pass duhet menjëherë të pezullohet për t’i dhënë kohën e nevojshme misionit ndërkombëtar të monitorimit që të kryejë vlerësimet e domosdoshme.

Përmes një deklarate, VV thekson se Komiteti i UNESCO-s për Trashëgiminë Botërore ka miratuar një rezolutë ku i kërkon qeverisë së Shqipërisë ndërprerjen urgjente të punimeve në By-Pass e Gjirokastrës, si shkak i ndikimit negativ që ka ky projekt duke dëmtuar monumentet e trashëgimisë kulturore.

LEXO EDHE  I dënuar me 18 vite burg në Itali, arrestohet në Lezhë 48-vjeçari

“Rezoluta i kërkon Republikës së Shqipërisë që të ftojë e të mirëpresë një mision zyrtar monitorimi i cili do të vlerësojë jo vetëm ndikimin e bajpasit në vlerat e trashëgimisë, por edhe të të gjitha projekteve të tjera në qytetin e Gjirokastrës.

Organizata të tjera ndërkombëtare si dhe Lëvizja VETËVENDOSJE!, bashkë me ish kandidatin për deputet në Gjirokastër, arkitektin Kreshnik Merxhani, e kanë paralajmëruar publikisht qeverinë mbi dëmet e këtij projekti dhe rrezikun për nxjerrjen e Gjirokastrës prej UNESCO-s si pjesë e trashëgimisë botërore.

Megjithatë, qeveria, në kundërshtim me ruajtjen e vlerave kulturore e historike, rregullat e prokurimit publik dhe pa transparencë apo konsultim me banorët e zonës, ka vijuar me zbatimin e projektit të ndërtimit të bajpasit”, thuhet në deklaratë.