Dy prokurorë të rinj i bashkohen SPAK-ut

Prokurorisë së Posaçme Kundër Korrupsionit dhe Krimit të Organizuar i bashkohen dy prokurorë të rinj: Adnan Xholi dhe Dorina Bejko.

Më 18 Maj, KLP shpalli dy vakanca për ngritjen në detyrë të prokurorëve në Prokurorinë e Posaçme. Brenda afatit të përcaktuar, shprehën interes dy kandidatët, Adnan Xholi dhe Dorina Bejko. Pas verifikimit të plotësimit të kushteve ligjore nga ana e Komisionit të Posaçëm për ngritjen në detyrë si prokurorë në SPAK, Këshilli miratoi më 9 Qershor listën e kandidatëve që plotësojnë kushtet ligjore dhe mund të vazhdojnë procesin e vlerësimit e kritereve të posaçme etike dhe profesionale: Adnan Xholi e Dorina Bejko.

LEXO EDHE  Kursi i këmbimit/ Rriten paundi, dollari dhe euro, zhvlerësohet franga

Këtë të Premte, u zhvilluan në KLP intervistat me dy prokurorët. Në përfundim të procesit të pikëzimit, KLP renditi prokurorët Adnan Xholi me 183 pikë dhe Dorina Bejko me 180 pikë.

Kështu, KLP vendosi emërimin e prokurorëve Adnan Xholi dhe Dorina Bejko në Prokurorinë e Posaçme.

Deri tani, KLP ka emëruar 15 prokurorë në SPAK.