Nga Boldnews.al
Një nga koncesionet që po rëndon xhepat e shqiptarëve është ai i laboratorëve mjekësorë. Një koncesion që do t’na kushtojë plot 100 milionë euro në 10 vjet. Por, pavarësisht se po paguhet sa “frëngu pulën”, sërish ai po “ndihmohet” me se të mundet.
Koncesionari arriti të mbyllë edhe laboratorin Covid si dhe la në rrugë dhjetëra punonjës të këtij stafi. Por, Spitali Nënë Tereza po e ndihmon edhe me materiale konsumi. Enkelejd Joti justifikohet se kështu parashikohet në kontratën koncesionare. Natyrisht që ai nuk është firmëtari, por kryeministri Rama dhe zv.kryeministri Braçe.
Sipas dokumenteve që disponon BoldNews, Qendra Spitalore Nënë Tereza ka hapur një tender për blerje mallrash. Në dokumentin e mësipërm, thuhet se kërkohet “blerje kontenitorë dhe materiale konsumi në zbatim të kontratës koncesionare të laboratorëve për një periudhë 12 mujore për nëvoja të QSUNT”.
Vlera e tenderi është 7.808.987 lekë me TVSH, ndërkohë që me TVSH shuma shkon në rreth 100 milionë lekë të vjetra. Por, pas këtij tenderi lindin shumë pikëpyetje: Cili shtetar i la hapësirë koncesionarit që këto materiale të blihen nga QSUT? A nuk i mjaftojnë 100 milionë eurot për të blerë këto materiale? Kujtojmë se koncesionari ka në përdorim ambientet e spitalit me të gjitha kushtet. Dhe, me një investim të vogël, po bën analizat. Por, përse i duhet kjo “ndihmë”?
Vitin e kaluar, koncesionari mori nën administrim tre laboratorët kyçë të QSUNT-së; laboratorin Mikrobiologjik, atë të Imunologjisë si dhe shërbimin Klinik-Biokimik. Koncesioni i debatueshëm i shërbimit të laboratorëve-i katërti në shëndetësi pas Check up-it, hemodializës dhe sterilizimit të sallave kirurgjikale pritet t’u kushtojë taksapaguesve shqiptarë rreth 13 miliardë lekë në 10 vjet ose rreth 100 milionë dollarë.
Kontrata koncesionare “Për ofrimin e shërbimit laboratorik të spitaleve universitare, rajonale dhe atyre bashkiake të Sarandës dhe Lushnjes” u firmos në 24 prill 2019 nga zv.kryeministri Erion Braçe, në mungesë dhe me porosi të kryeministrit Edi Rama. Ai u fitua në prill 2017 nga konsorciumi i tre kompanive; Labopharma sh.p.k me 41.7%, Exalab France me 25% dhe AB Laboratory Solution BV, një kompani e regjistruar në Holandë me 33% pjesë në konsorcium. Por, pas hapjes së letrave, në “shesh” dolën kompani shqiptare, si në koncesionet e tjera.
