Mbrëmje zhgënjyese për skuadrat shqiptare, ja rezultatet në Conference League

Vijon nata “JO” për ekipet shqiptare në arenën Europiane. Mbrëmjen e sotme në fushë zbritën katër klube të Superiores ku tre prej tyre u mposhtën duke komprementuar kalimin më tej në Ligën e Konferencës.

Rezultati më i papritur ishte humbja e Teutës në “Niko Dovana”, 0-2 përballë modestëve të Inter Escaldes.

Skuadra e Martinit e nisi vrullshëm ndeshjen, por humbët disa raste të mira për shënim. Pikërisht në momentin më të mirë të “djemve të detit”, Sol De Vila kaloi në avantazh Inter D’Eslakdes me gjuajtjen e parë në portë.

Në pjesën e dytë, Teuta u hodh në kërkim të golit të barazimit, por nga një gafë në mbrojtje e Hoxhës dhe kapiten Arapit, kampionët e Andorras shënuan dhe golin e dytë dhe të nokautit.

LEXO EDHE  Jo vetëm Benzema, tjetër titullar i Real Madrid pozitiv me COVID

Partizani u mposht me shifrat e thella 3-0 nga Baseli në Zvicër, duke mos arritur që të bëj të paktën një gol dhe të lë të hapur gjithçka për sfidën e kthimit në Shqipëri.

Humbje pësoi edhe Vllaznia e cila u dorëzua minimalisht në Qipro ndaj AELIT. Golin e vetëm, vendasit e shënuan në minutat shtesë të pjesës së parë me anë të Scepovic.

Nota e vetme pozitive në këtë mbrëmje, ishte fitorja historike e Laçit ndaj rumunëve të Krajvës. Kurbinasit dolën triumfator falë golit të realizuar nga sulmuesi Zarubica në minutën e 35-të.

Takimet e kthimit do të luhen një javë më pas, ku do mësohen edhe skuadrat që do vijojnë në raundin e tretë në Conference League.