“Vuaj nga zemra dhe diabeti”, Tushe kërkon lirinë në Apelin e GJKKO

Ish-kryebashkiaku i Lushnjes, Fatos Tushe, i arrestuar me urdhër të SPAK për shpërdorim detyre dhe abuzim me tenderat, i është drejtuar sërish Apelit të GJKKO për të kërkuar ndryshimin e masës së sigurisë.

Tushe kërkon një masë tjetër arresti, jo me burg, sikundër ka vendosur GJKKO, me pretendimin se vuan nga disa sëmundje dhe e ka të pamundur të qëndrojë në qeli.

Sipas avokatit, i cili ka paraqitur pretendimet e Tushes, ai vuan prej vitesh nga sëmundje kardiake, diabet, gur në tëmth me kriza të vazhdueshme akte, alergji ndaj disa ushqimeve si dhe problemet me mushkërinë.

LEXO EDHE  Në Mykonos me vajzën e Trump, kush është shqiptari afër Grenellit në Jug

“Z. Tushe vuan prej vitesh nga sëmundje kardiake, diabet, gur në tëmth me kriza të vazhdueshme akute, nga mushkëria si dhe është alergjik/intolerant ndaj disa ushqimeve. Problemet shëndetësore të tij provohen nga të dhënat e pasqyruara në dokumentat e poshtëshënuara”, thuhet në shkresë.

Tushe u arrestua rreth 3 javë më parë, bashkë me disa ish-zyrtarë dhe zyrtarë të Bashkisë së Lushnjes, si dhe dy biznesmenë, lidhur me një tender për pastrimin e një kanali. Hetimet për Tushen dhe zyrtarët e tjerë kishin disa muaj që zhvilloheshin nga SPAK, ndërsa personat e arrestuar ishin evidentuar edhe në përgjime.