Kampionët e Shqipërisë do të zbresin nesër në fushë në “Conference League” dhe ndryshe nga ndeshja e kaluar ndaj Sheriff, kësaj radhe do të kenë një rival më të lehtë në letër, si Inter d’Escaldes që është plotësisht i kalueshëm.
Në konferencën për shtyp, trajneri Edi Martini e pranon se ekipi ka shanse reale për t’u kualifikuar por kërkon edhe ndihmën e tifozëve në “Niko Dovana”.
Si duket situata në skuadër pas asaj humbjeje ndaj Sheriff Tiraspol?
“Situata është mjaft e mirë. Ndeshja e parë me Tiraspolin këtu, na vuri në dukje disa probleme që u munduam t’i riparojmë, në ndeshjen e dytë dhe gjatë javës këtu. Gjendja është e mirë, përveç Lorenzo Vilës që ka dëmtim, pjesa tjetër është ok dhe jemi në gjendje optimale”.
Sa e njihni kundërshtarin e radhës Inter d’Escaldes?
“E njohim, falë atyre dy ndeshjeve që kanë bërë në Shqipëri. I kemi parë. Duhet të bëjmë atë që dimë më mirë të bëjmë lojën tonë, të mos merremi shumë më mënyrën e lojës së kundërshtarit, por të bëjmë mirë lojën tonë: mënyrën e daljes në sulm apo përqendrimit maksimal që duhet të kemi në fushën e lojës. Shpresoj t’ia dalim”.
Siç e thatë edhe ju, Lorenzo Vila është i dëmtuar, çfarë pritet të ndryshojë në formacion?
“Pothuajse 90% është i fiksuar formacioni, por mund të ketë ndonjë ndryshim deri nesër. Vila na ka nxjerrë disa probleme me mungesën e tij. Megjithatë, edhe lojtarët e tjerë do mundohen të bëjnë më të mirën, edhe ata që mund të futen si zëvendësues. Shpresojmë ta rregullojmë, që të mos ndihet mungesa e tij”.
Sa shanse mendoni se keni për kualifikim?
“Në letër kemi shanse shumë për t’u kualifikuar, por letra nuk është gjithçka. Pavarësisht cilësive tona dhe të kundërshtarit, duhet të jemi 100% të mobilizuar në fushë. Është një ndeshje e fortë, e luftuar, të gjithë dinë të mbrojnë dhe të kundërsulmojnë mirë. Shanset janë më tepër për ne, por shpirti i garës bën diferencën”.
Keni besim se do të mbyllnit llogaritë e kualifikimit që në ndeshjen e parë?
“Do doja të mbyllnim llogaritë e kualifikimit që në ndeshjen e parë, por janë dy ndeshje për t’u luajtur. Të bëjmë sa më mirë ndeshjen e parë, por nuk duhet të mendojmë që mund t’ia dalim që në ndeshjen e parë, pasi janë dy ndeshje të vështirë”.
A keni një mesazh për tifozët përpara ndeshjes me Inter d’Escaldes?
“Ne kemi treguar gjatë gjithë vitit profesionalizëm, pavarësisht së nuk kemi pasur mbështetje për shkak të Covid-it. Shpresoj që tifozët të jenë sa më të shumtë nesër, pasi realisht kemi nevojë për mbështetjen e tyre, dhe ishalla ua shpërblejmë”, përfundoi trajneri Martini në konferencën për shtyp./Oranews
