Sot në orët e para të mëngjesit është gjetur pa shenja jete një shtetase në Gjilan e cila është ish asamblistja e Partisë Demokratike të Kosovës në Gjilan, Arzie Nuhiu.
Zëdhënësi i Policisë së Kosovës për rajonin e Gjilanit, Ismet Hashani konfirmoi se rasti ka ndodhur rreth orës 03:00 të mëngjesit.
Rreth orës 03:50 të mëngjesit, Policia e Kosovës në Gjilan është njoftuar se në rrugën ‘Raif Halimi’, në pjesën e pasme të njërës nga ndërtesat është parë trupi i pajetë i një gruaje i cili më pas u identifikua nga familjarët.
Hashani shtoi se dyshimet fillestare janë se Nuhiu ka rënë nga ballkoni i banesës së saj.
“Në vendngjarje ka mbërritur ndihma e parë por me pas u konstatua e vdekur nga mjeket. Në vendngjarje ka shkuar edhe prokurori i shtetit për ‘Krime të Rënda’, njësitet e hetimeve dhe forenzikës rajonale. Prokurori i shtetit ka urdhëruar që trupi i pa jetë te dërgohet në Institutin e Mjekësisë Ligjore – Prishtinë. Rrethanat dhe motivet se si ka ndodhur ngjarja ende nuk dihen.
Hashani pohoi se rasti për momentin është cilësuar si “Vdekje e dyshimtë” dhe hetimet e mëtejme janë duke u udhëhequr nga Policia e Kosovës.
