Ish-Sekretari i Përgjithshëm i Partisë Demokratike, Arben Ristani, përmes një interviste të dhënë për FaxNews, ka analizuar punimet në Kuvendin Kombëtar, ku u zgjodhën 300 delegatët e rinj në Këshillin Kombëtar.
Ristani, i cili nuk mundi dot të siguronte një vend në Këshillin e ri Kombëtar të PD-së, shprehet se ambiciet e tij në politikë i ka realizuar dhe qëndrimi i tij lidhet me të ardhmen e Partisë Demokratike.
Ish-deputeti thekson se ky Kuvend pritej të ishte rikthimi i shresës në PD, nuk prodhoi asgjë dhe është për tu harruar pasi vetëm sa zgjidhi disa nga problemet e Bashës.
“Problemi është që sot PD për herë të parë në këto 30 vjet demokraci do të jetë për herë të tretë në opozitë, opozita po vuan bashkë me shqiptarët për herë të tretë. Do të duhej një reflektim më i thellë, duhej të merreshin përgjegjësitë në lidhje me zgjedhjet e humbura dhe të ndodhte kthesa e madhe për të rikthyer ringritjen e Partisë Demokratike.
Por duket që ky Kuvend është mbajtur për të mbyllur hallet e Bashës, i cili nuk ka një projekt për të udhëhequr PD-në.
Ambiciet e mia në politikë i kam realizuar dhe ka rrugë të pafundme për t’u marrë me politikë kur t’i ke vokacion politik.
Këshilli Kombëtar nuk mori asnjë vendim që nuk mund të mbahet mend. Mbledhja e mëparshme e Këshillit Kombëtar u mbajt në Zoom dhe nuk u mor asnjë vendim.
Demokratët por dhe shqiptarët që e ndoqën Kongresin kuptuan dhe pamë cilat ishin propozimet e miratuara.
Nga një Kuvend që pritej të bëhej ndryshimi i madh, në fakt është një kongres për tu harruar pasi nuk prodhoi asgjë.
Tre vendimet themelore të Kongresit ishte shtimi i numrit të anëtarëve të Këshillit Kombëtar, si dhe propozimet e emrave të rinj për në Këshill, që në thelb nuk sjell asnjë ndryshim dhe real.
Ajo që pritej dhe duhet të bëhej, pasi ne kishim dhe një manifest të propozuar nga zoti Fatbardh Kadilli, që propozonte ndryshimet statuore mbi mënyrën si duhej të riorganizohej Partia Demokratike. U vendos nga Basha që këto propozime mos të shkonin në Kuvendin Kombëtar dhe ky Kongres që duhej të ishte i jashtëzakonshëm është për tu harruar dhe do të harrohet”, tha Ristani.
Gjithashtu Ristani theksoi se ashtu sikurse Rama edhe Basha është shndëruar në një autocrat të vogël që sundon Partinë Demokratike.
“Ashtu si Rama po kethehet ne një sundimtar të vendit edhe Lulzim Basha po kthehet në një sundimtar të vogël në PD”, tha Ristani.
