Conference League/ Klubet shqiptare mësojnë rivalët e raundit të tretë

Është hedhur në Nyon të Zvicrës shorti për raundin e tretë eliminator të Conference League. Eventi më i ri që këtë vit ka marrë rrugë, trofeu i të cilit vitin e ardhshëm do të dorëzohet në “Air Albania” për fituesin, ka mësuar çiftet e raundit të tretë ku mund të luajnë klubet shqiptare gjithmonë nëse do të kualifikohen në takimet përkatëse të raundit të dytë.

Teuta që ka një duel të lehtë përballë Inter d’Escaldes në raundin e dytë do të luajë në raundin e tretë Shamrock Rovers, kampionët e Irlandës. Një test i vështirë për ekipin durrsak.

Nëse Vllaznia do të kalojë AEL Limassol në dy ndeshjet e parashikuara, do të ketë përballë më tej në Conference League ekipin që do të kualifikohet nga Qarabağ (AZE) / Ashdod (ISR). Azerët janë njohje e vjetër pasi ka luajtur prej vitesh Ansi Agolli dhe janë një ekip shumë i vështirë për t’u mundur.

LEXO EDHE  Zyrtare/ Michael Ngoo rikthehet te Tirana, firmos për një sezon

Ndërkohë Prishtina e cila duhet të kalojë më parë Connah, do të ketë një short të vështirë pasi do të luajë me fituesin e çiftit Valur/Bodo Glimt dhe këta të fundit, kampionët e Norvegjisë, janë favorit për të avancuar.

Ndeshjet e raundit të tretë eliminator të Conference League do të luhen më 5 gusht takimet e vajtjes dhe më 12 gusht ato të kthimit.