Dita ndërkombëtare e ‘Nelson Mandelës’/ Meta: Populli ynë ka ‘Mandelat’ e tij, u burgosën padrejtësisht për të sjellë lirinë e të gjithëve

Presidenti i Republikës Ilir Meta ka risjellë në vëmendje Ditën Ndërkombëtare të Nelson Mandalës.

Meta thekson se edhe Shqipëria e Kosova kanë ‘Mandelat’ e tyre të tillë si At Zef Pllumin, Pjetër Arbnorin, Adem Demaçi.

Reagimi i presidentit Ilir Meta:

Dita Ndërkombëtare e Nelson Mandelës na risjell sot në vëmendje veprën dhe trashëgiminë e vlerave të një personaliteti të madh dhe të paharruar, simbol të vuajtjeve në emër dhe për mbrojtjen e lirive dhe të drejtave të njeriut, i cili frymëzon në çdo kohë me angazhimin dhe përkushtimin e palodhur për paqen dhe pajtimin.

Në Shqipëri dhe në Kosovë ne kemi patur At Zef Pllumin, Pjetër Arbnorin, Adem Demaçin dhe mijëra ‘Mandelat’ tanë, të cilët për dekada me radhë u privuan nga liria, vuajtën dhe u përndoqën nga regjime mizore për shkak të ideve dhe besimeve të tyre, por mbijetuan për të na rrëfyer dhe inkurajuar për të qenë më tolerantë për idetë, besimet dhe kulturat e njëri-tjetrit, si dhe gjithmonë syçelët për mbrojtjen e demokracisë dhe pluralizmit.