Projeksioni nga Instituti amerikan/ Vala tjetër e pandemisë godet Shqipërinë në tetor, ja skenarët

Instituti i të Dhënave Shëndetësore në Universitetin e Washingtonit në SHBA, paralajmëron se Shqipëria mund të përballet me një valë tjetër pandemia në tetor-nëntor.

Aktualisht në Shqipëri ka një numër të vogël të rasteve ditore, të deklaruara zyrtarisht nga Ministria e Shëndetësisë, të cilat variojnë nga 8 në 18 raste, përgjatë ditëve të fundit.

Por për sa kohë mund të vazhdojë ky trend, pra me një numër të ulët rastesh, ndërkohë që procesi i vaksinimit po vijon, ndërsa vaksina më e aplikuar në popullatë është ajo kineze?

Projeksioni i pandemise ne Shqiperi, sipas Institutit te Dhenave Shendetesore

Sipas Institutit të të Dhënave Shëndetësore në Universitetin e Uashingtonit, vala e tetor-nentorit 2021 nuk do të jetë me intensitetin e nëntor-dhjetorit (2020) apo shkurt-marsit(2021), megjithatë është një situatë që do të testojë sërish sistemin shëndetësor të vendit.

Në projeksionin e dhënë, parashikohet që gjatë tetorit Shqipëria mund të shkojë në kushte normale deri mesatarisht 14 vdekje në ditë dhe në kushte ekstreme deri në 20 vdekje në ditë.

Sa i përket rasteve aktive, projeksioni vijon nga 5 300 në kushte normale në 7 100 në kushte ekstreme.

Sipas këtij instituti, rreziku minimizohet nëse qeveria vendos sërish mbajtjen e maskave me detyrim në ambiente të jashtme dhe të brendshme ku numri i vdekjeve ulet deri në 1-2 në ditë dhe ai i rasteve aktive mes 510-530 të tilla.

LEXO EDHE  Tritan Shehu: Regjimi i Ramës mposhtet vetëm me përballje të fortë në terren

Deri më tani në Shqipëri nuk është konfirmuar varianti “Delta”, megjithatë ditët e fundit vërehet një rritje e lehtë e rasteve.

Nga muaji mars 2020, kur zyrtarisht u shfaqën edhe rastet e para të Covid-19, numri i personave të prekur nga Covid-19, sipas shifrave zyrtare të Ministrisë së Shëndetësisë, është 132665 persona, edhe pse shifra është disa herë më e lartë.

Gjithashtu Ministria e Shëndetësisë ka deklaruar zyrtarisht se nga pandemia kanë humbur jetën 2456 persona, ndonëse referuar shifrave të INSTAT, numri i vdekjeve krahasuar me vitet e mëparshme është disa herë më i lartë.

Ekspertë të ndryshëm në fushën e shëndetit publik, por edhe epidemiologë, kanë deklaruar publikisht se shifrat e Qeverisë lidhur me numrin e të prekurve nga Covid-19 dhe vdekjet, janë disa herë më të ulëta, ndërsa shpesh janë hedhur hipoteza se në Shqipëri është arritur imuniteti natyror, pra që rreth 70 % e personave mund të kenë kaluar Covid-19.