Një person është arrestuar, ndërsa dy të tjerë janë shpallur në kërkim si pjesë e një grupi që merrej me trafik drogë në Shkodër. Në kuadër të aksionit të koduar “Lotaj”, që erdhi pas hetimeve disamujore të prokurorisë Shkodër, janë sekuestruar lëndë narkotike dhe tre telefona celularë.
Policia e cilëson “grupin kriminal, me rrezikshmëri të lartë shoqërore, që merrej me prodhimin dhe shitjen e lëndës narkotike”. Sipas të njëjtave burime, aktiviteti i grupit ishte i shtrirë në disa vende të qarkut Shkodër.
Policia njoftoi këtë të Enjte se u arrestua F G., 24 vjeç, banues në Grudë e Re, Shkodër, si dhe u shpallën në kërkim shtetasit A. G. dhe K. B., të dyshuar për veprat penale “Prodhimi dhe shitja e narkotikëve” dhe “Kultivimi i bimëve narkotike”, kryer në bashkëpunim.
Aksioni
“Gjatë operacionit rezultoi se në një sipërfaqe të pyllëzuar në fshatin Lotaj, këta shtetas po ushtronin veprimtari kriminale në fushën e kultivimit të kanabisit. Në brendësi të zonës së pyllëzuar u konstatua edhe një stan të cilin këta shtetas e kishin përshtatur për të fjetur, ku u gjet dhe një sasi lënde narkotike e dyshuar marijuanë. Gjatë operacionit u kap në flagrancë F.G., ndërsa shtetasit A. G. dhe K. B., të cilët kanë mundur të largohen, janë shpallur në kërkim”, shtuan të njëjtat burime.
Materialet do t’i kalojnë Prokurorisë së Rrethit Gjyqësor Shkodër, për veprat penale “Prodhimi dhe shitja e narkotikëve”, “Kultivimi i bimëve narkotike” dhe “Pastrimi i produkteve të veprës penale” të kryera në bashkëpunim, mbyllet njoftimi.
