SHBA: Po shqyrtohet nevoja e dozës së tretë të vaksinës së Covid-19

Shtetet e Bashkuara po rishikojnë nëse një dozë e tretë e vaksinës Covid-19 është e nevojshme tek personat  që janë vaksinuar tashmë.

“Duhet të mbledhim më shumë të dhëna për të parë nëse  doza e tretë  shtesë mund të rrisë rrezikun e efekteve anësore serioze”, tha sot një zyrtar shëndetësor.

Sipas  zyrtarit, doza e dytë është  shoqëruar me nivele më të larta të efekteve anësore. Si rrjedhojë një dozë tjetër mund të shoqërohet me rreziqe edhe më të mëdha.

“Jemi shumë të interesuar të dimë nëse një dozë e tretë mund të shoqërohet me rrezik më të lartë të efekteve anësore”,  tha Jay Butler, zëvendës drejtor i Qendrave për Kontrollin dhe Parandalimin e Sëmundjeve.

LEXO EDHE  Vaksina Pfizer pritet të marrë miratimin e plotë deri në shtator

Qeveria e SHBA nuk ka vendosur nëse do të sigurojë doza përforcuese të vaksinës por beson se kjo mund të jetë e nevojshme për të moshuarit dhe grupet e tjera të popullsisë që rrezikojnë të zhvillojnë një infeksion serioz, shtoi ai.

Partnerët Pfizer dhe BioNTEch planifikojnë të kërkojnë miratim nga rregullatorët amerikanë në javët e ardhshme për dozën shtesë të vaksinës Covid-19, duke përmendur se rreziku i infeksionit rritet gjashtë muaj pas vaksinimit.

Megjithatë,  Jay Butler, zëvendës drejtor i Qendrave për Kontrollin dhe Parandalimin e Sëmundjeve tha se ai nuk ka vërejtur dobësim të imunitetit te banorët e SHBA, të cilët janë vaksinuar dhjetorin dhe janarin e kaluar.