UEFA shpërndan 331 milionë euro premio, ja sa arkëtoi Italia si fituese e Europianit

Është 331 milionë euro çmimi total që UEFA po përgatitet për të shpërndarë mes kombëtareve që kanë marrë pjesë në “Euro 2020”. Pavarësisht pandemisë, bëhet fjalë për një rritje krahasuar me 2016-ën, kur kanë qenë 301 milionë.

ITALIA DHE TË MËDHATË – Kualifikimi ka vlejtur 9,25 milionë, çdo fitore në fazën e grupeve 1 milion, kalimi në 1/8-at 1,5 milionë, çerekfinalet 2,5 milionë, gjysmëfinalet 4 milionë, ndërsa faza finale 5 milionë; ndërkohë që për atë që ngre trofeun janë parashikuar 3 milionë të tjerë: Italia arkëton kështu 28,25 milionë. Ndërsa rrugëtimi i Anglisë drejt finales i ka lejuar Federatës Angleze të arkëtojë rreth 30 milionë euro.

Në 2016-ën Portugalia duke triumfuar arkëtoi 25,5 milionë, por këtë herë luzitanët, po ashtu si finalistja tjetër e atij viti (Franca) dhe Gjermania janë ndër kombëtaret që kanë arkëtuar më pak, duke konsideruar skuadrat që kanë kaluar grupet: 12,5 milionë për Gjermaninë dhe Portugalinë (po ashtu si Kroacia dhe Uellsi), 12,75 milionë për Francën (si Suedia dhe Austria), me Holandën pak më përpara me 13,75 milionë.

LEXO EDHE  FOTO/ Kapiteni i Vllaznisë i jep fund beqarisë, presidenti Xhaferi: Premtoji shoqes...

TË TJERAT – Ndërsa mes skuadrave të eliminuara në çerekfinale, Belgjika ka marrë 16,25 milionë, krahasuar me 14,25 milionët e Ukrainës dhe 14,75 milionët e Zvicrës dhe Republikës Çeke. Danimarka ndërkohë preu një çek prej 18,25 milionësh, një më pak se gjysmëfinalistja tjetër, gjithashtu e mposhtur, Spanja (19,25 milionë).

PARA EDHE PËR KLUBET – Buzëqeshin pra federatat, por edhe klubet. UEFA, në fakt, ka garantuar një total prej 130 milionë eurosh për klubet që u kanë dhënë lojtarë kombëtareve për Europianin, në bazë të numrit të ditëve që kanë kaluar në gatishmëri të trajnerëve të përfaqësueseve: mes skuadrave me më shumë të grumbulluar janë Mançester Siti, Çelsi, Juventusi, Atalanta dhe Interi.