Një punonjës i Inspektoratit të Mbrojtjes së Territorit të bashkisë Himarë është vënë në pranga, pasi akuzohet për shpërdorim detyre. Ai akuzohet se në bashkëpunim me kolegë të tjerë kanë lejuar ndërtime pa leje në Himarë.
Policia njoftoi se specialistet e Seksionit për Hetimin e Krimit Ekonomik e Financiar në Drejtorinë Vendore të Policisë Vlorë, në vijim të punës për kapjen e personave në kërkim dhe vënien e tyre para përgjegjësisë penale, ndaluan shtetasin M. N., 36 vjeç, banues në Sarandë, me detyrë punonjës pranë Inspektoratit të Mbrojtjes së Territorit të bashkisë Himarë.
Ndaj tij, Gjykata e Rrethit Gjyqësor Vlorë ka caktuar masën e sigurisë “Arrest në burg”, për veprën penale “Shpërdorimi i detyrës”.
Ky shtetas, në bashkëpunim me R.H. dhe E.Z. (të arrestuar më parë) dhe Dh.B. (i shpallur në kërkim), ish-punonjës pranë Inspektoratit të Mbrojtjes së Territorit të Bashkisë Himarë, gjatë muajit Maj ka shpërdoruar detyrën, duke lejuar ndërtimin e paligjshëm të disa objekteve në territorin e bashkisë Himarë.
