Partizani është rritur jas htëzakonisht shumë që nga koha kur trajneri Ilir Daja mori timonin e klubit, më datë 10 gusht të vitit të shkuar. Kur nuk është mbushur ende viti, ndryshimi është drastik dhe Partizani tashmë është një ekip që krijon frikë te kundërshtarët.
Edhe pse Daja nuk ka arritur për asnjë moment ta ndërtojë ekipin në kushtet optimale, po u merr maksimumin lojtarëve që ka në dispozicion. Verën e shkuar merkatoja ishte e bllokuar dhe planet u bënë pa Çinarin. Në janar dihen vështirësitë e transferimeve, ndërsa fundi i sezonit u eklipsua nga largimet e shumta të lojtarëve kryesorë. Pavarësisht të gjitha vështirësive, Daja gjithmonë u ka marrë maksimumin futbollistëve dhe ka ndërtuar një ekip konkurrues.
Sezonin e shkuar ishte shumë pranë fitimit të titullit kampion, ndërsa këtë sezon të ri e nisi në mënyrën më të mirë të mundshme, duke marrë fitoren më të thellë në historinë e Partizanit në Europë, 5-2 kundër Sfintulit. Por, cilat janë sekretet e Dajës që po arrin më së miri ta mbajë Partizanin në krye të tabelës dhe të konsiderohet si një ndër favoritët kryesorë për fitimin e të dy trofeve?
MANOVRA- Flitet shumë për manovrën e Ilir Dajës, madje dhe vetë strategu 54-vjeçar e ka kryefjalë të tij. Manovra e lojës është gjëja më e rëndësishme për të dhe nuk ka rëndësi kush luan, pasi të gjithë suksesin dëshiron ta marrë nga grupi. Nëse skuadra luan ashtu siç Daja i urdhëron, atëherë kualitetet individuale kanë pak rëndësi. Madje Daja ka hequr dorë edhe nga futbollistë cilësorë si Melo e Hasani, pikërisht për shkak të manovrës. Gjithashtu, strategu 54-vjeçar ka shumë besim edhe te të rinjtë, që sakrifikojnë shumë për të luajtur me një ekip si Partizani.
SULMI- Partizani ishte ekipi më me shumë gola sezonin e shkuar në Superiore dhe kjo statistikë nuk erdhi rastësisht. Daja u jep liri sulmuesve të tij të bëjnë rrotacion dhe të krijojnë panik te kundërshtarët. Manovra e tij është e rëndësishme deri afër zonës së kundërshtarit dhe nga aty, ka besim te sulmuesit e tij. E jo më kot, pasi Partizani ka artileri të rëndë në sulm. Stenio Zhunior është lojtari kryesor, i cili e tregoi dhe në sfidën kundër Sfintulit, që është një bomber që do të përhapë panik për çdo mbrojtje kundërshtare. Edhe me disa përforcime të tjera të mundshme, Daja pa diskutim që do të ndërtonte një ekip edhe më të frikshëm. /Panoramasport
