Është shtyrë sërish seanca e dosjes ‘184’ për zgjedhjet për Bashkinë Dibër të vitit 2016.
Këtë të enjte dy nga katër të pandehurit e dosjes 184 në Dibër kanë dalë para togave të zeza në seancën e radhës për akuzën e ndikimit tek votuesit në zgjedhjet për Bashkinë Dibër të vitit 2016.
Sot dolën para gjykatës Drini Gjeci, ish-drejtor i Arsimit dhe Nuri Meda, zyrtar në njësinë administrative Tomin.
Drini Gjeci dhe Nuri Meda kanë kërkuar gjykim të shkurtuar. Seanca për ta ishte planifikuar për t’u zhvilluar sot në orën 13:00, por është shtyrë për në datën 22 korrik pasi mungonin avokatët.
Prokuroria i mbylli hetimet në dhjetor të 2020 dhe ngriti akuzë vetëm për 4 përrsona ndërsa për pjesën tjetër të të dyshuarve të përfshirë në këtë çështje është kërkuar pushimi i çështjes. Të pandehur janë: Robert Aga ish-shef komisariati në Dibër, i akuzuar për shpërdorim detyre; Drini Gjeçi, ish-drejtor i arsimit, akuzuar për shpërdorim detyre dhe kanosje të zgjedhësve; Nuri Meda, zyrtar në njësinë administrative Tomin, akuzuar për shpërdorim detyre Hasan Hoti, Njësia administrative Lurë, akuzuar për kanosje të zgjedhësve.
Prokuroria kërkoi pushimin e çështjes Dionis Imeraj, Imer Lala, Arben Keshi, Bekim Krashi, Afrim Mikli, me argumentin se për këta persona është parashkruar vepra penale e shitblerjes së votave pasi kanë kaluar 3 vite. Në shtator 2019, Prokuroria e Krimeve të Rënda kaloi hetimet për “Dosjen 184” në prokurorinë e Dibrës. Ky kalim u bë në shkelje të ligjit. Në janar 2020, SPAK konfirmoi vendimin dhe nuk pranoi të merrte çështjen për shqyrtim. Megjithëse dosja 184 përfshin përgjime të ish-Ministrave Tahiri, Gjiknuri dhe deputetë socialistë në biseda me policë, biznesmenë dhe persona të dyshimtë të cilët angazhohen për të siguruar vota në mënyra të paligjshme për zgjedhjet në Dibër, – SPAK nuk pranoi ta shqyrtojë atë.
