Shtohet trysnia ndërkombëtare ndaj Kryeministrit Edi Rama për t´u tërhequr nga vendimi për zgjedhjen e kreut të ri të AMA-s gjatë seancës së sotme, e cila është e fundit për këtë legjislaturë.
Pas reagimit të Delegacionit të BE, ku u kërkua që kryetari i AMA të zgjidhet kur të mblidhet Parlamenti i ri, edhe OSBE i ka kërkuar mazhorancës socialiste të drejtuar nga Edi Rama, që të ndalë procesin.
Në një njoftim të OSBE thuhet se “ne nënvizojmë rëndësinë e një procesi gjithëpërfshirës dhe transparent për emërimin e kryetarit dhe anëtarëve të rinj të AMA-s, për të garantuar që AMA ta përmbushë më së miri misionin e saj të ndjeshëm”.
“Prezenca e OSBE-së në Shqipëri ka ndjekur procesin e zgjedhjes së kryetarit dhe anëtarëve të Autoritetit të Mediave Audiovizive (AMA).
Po ashtu, ne kemi qenë në kontakt me aktorët përkatës, duke theksuar nevojën për një organ të pavarur të rregullimit të medias.
Ne nënvizojmë rëndësinë e një procesi gjithëpërfshirës dhe transparent për emërimin e kryetarit dhe anëtarëve të rinj të AMA-s, për të garantuar që AMA ta përmbushë më së miri misionin e saj të ndjeshëm”, thekson deklarata.
