Bashkimi Europian i është drejtuar me një apel Kuvendit për të mos votuar sot kreun e AMA-s. Delegacioni i BE-së kërkon që votimi për kreun e AMA të bëhet në shtator nga Parlamenti i ri, ndërkohë që sot në seancën e fundit parlamentare të kësaj legjislature, mazhoranca ka në rend dite votimit për dy emrat e propozuar po nga socialistët.
Në një reagim pak orë para se Kuvendi të emërojë drejtuesin, në thirrjen e BE thuhet se kreu i ri i AMA-s duhet të zgjidhet në muajin shtator, kur të jetë ngritur edhe Parlamenti i ri.
BE thekson se ka ndjekur të gjitha zhvillimet sa i takon përzgjedhjes së kreut të ri të AMA-s, dhe thekson se është e nevojshme që ky institucion të qëndrojë larg ndikimeve partiake.
“Autoritetet rregullatore të mediave duhet të punojnë në mënyrë të paanshme, transparente dhe me një legjitimitet të njohur nga të gjithë.
Bashkimi Evropian ka rishikuar Direktivën e Shërbimeve të Mediave Audiovizive dhe ka paraqitur kërkesa të reja për pavarësi për rregullatorët kombëtarë të mediave përfshirë detyrimin për të vendosur procedura transparente dhe të pavarura për emërimin dhe shkarkimin e kryetarit dhe anëtarëve të bordit të këtyre autoriteteve. Ky legjislacion është pjesë e acquis të BE-së të cilin Shqipëria duhet të përshtasë.
Ne kemi ndjekur nga afër procesin për zgjedhjen e kryetarit të ri dhe anëtarëve të bordit të Autoritetit të Mediave Audiovizive (AMA). Është e rëndësishme që të mos ketë dyshime mbi natyrën jopartiake, profesionale dhe pluraliste të punës së AMA-s. Vëmë re se votimi nga Parlamenti për emërimin e kryetarit është planifikuar për sot, në seancën e fundit të kësaj legjislature.
Ne i ftojmë autoritetet të marrin në konsideratë të vazhdojnë me këtë emërim gjatë legjislaturës së ardhshme në shtator, së bashku me emërimin e anëtarëve të bordit të Autoritetit, si mënyra më e mirë për të arritur konsensusin dhe legjitimitetin e pranuar gjerësisht”, thuhet në reagimin e BE.
Nuk dihet nëse ky apel do të merret në konsideratë apo jo nga Kryeministri Rama dhe deputetët e PS-së, një pjesë e të cilëve në shtator nuk do të jenë më anëtarë të Parlamentit.
Në garën për kreun e AMA janë Alketa Dibra dhe Armela Krasniqi, e cila sipas akuzave nga opozita është e favorizuar.
