Partia Demokratike kërkoi sot informacione në SPAK në lidhje me ecurinë e hetimeve për kryetarin e bashkisë së Tiranës, Erion Veliaj, nga 9 dosje që ka depozituar në Prokurorinë e Posaçme.
Ish-deputeti, Gent Strazimiri, thotë për Rtv Ora se fakti që SPAK nuk po i mbyll dot është provë që dosjet janë të kopsitura mirë.
“Janë 9 dosje që kemi çuar ne se kanë çuar dhe të tjerët. Por 5 dosje ka çuar PD, opozita. Të jeni të bindur se janë të gjitha të argumentuara. Fakti që ata nuk i mbyllin dot i dedikohet faktit që janë të argumentuara mirë, të qepura dhe të kopsitura mirë. Rasti më flagrant, karshillëk ndaj ligjit, shuplakë në fytyrën e të gjithë atyre që thonë mori fund pandëshkueshmëria. Kushtetuesja merr vendimin që prishja e Teatrit ka qenë kriminale, antiligjore, me ligj klientelist dhe të dalësh të thuash, “po fituam, menjëherë do të fillojmë të ndërtojmë teatrin e ri”, në një kohë kur pjesë e vendimeve është edhe pezullimi i çdo veprimi për të ndërtuar Teatrin e Ri. Nuk është Fatos Tushe kreu i krimit dhe korrupsionit në Shqipëri është një nga ata djajtë e vegjël si kudo nëpër cepa. Korrupsioni nuk fle në Lushnje, specifikisht nuk fle në Karbunarë, nuk shkojnë aty paratë tona. Në mes të Tiranës, bulevardi “Dëshmorët e Kombit” nga fillimi deri në fund ha paratë e shqiptarëve, vetëm aty SPAK nuk shkon dot, se pse duhet pyetur”, tha ai.
