Fatos Tushe, kryetari i Bashkisë Lushnje është ndaluar nga Policia. Mësohet se Tushe është ndaluar në kuadër të një operacioni të organizuar nga Prokuroria e Posaçme Kundër Korrupsionit dhe Krimit të Organizuar dhe të zhvilluar nga forcat RENEA. Operacioni anti-korrupsion ka nisur mëngjesin e sotëm.
Deri më tani mësohet se janë arrestuar 10 zyrtarë të Bashkisë Lushnje.
Nga raportimet mësohet se operacioni i SPAK ka lidhje me abuzimet lidhur me pronat dhe lejet e ndërtimit. Dyshohet se Tushe ka shpërdoruar detyrën, duke pajisur me leje ndërtimi individë apo subjekte të ndryshme, në kundërshtim me ligjet.
Hetimet për personat e përfshirë në këtë skemë abuzimi, mësohet se kanë qenë nën hetim prej 6 muajsh, ndërkohë që SPAK ka kërkuar që të bëhet kontroll edhe në zyrën e Fatos Tushes.
SPAK ka kërkuar sekuestrimin e dosjes në zyrën e Kadastrës dhe të ndërmarrjes së punëve publike, ndërkohë që akuzat që rëndojnë mbi ta janë ”shpërdorimi i detyrës” dhe korrupsioni duke shpërdoruar fondet publike.
Tushe ka drejtuar Bashkinë që prej 2019-tës, ndërkohë që në 31 Dhjetor të atij viti iu bë dhe një atentat me granat brenda në zyrën e tij.
Autor i kësaj ngjarje asokohe u tha se ishte shtetasi, Gëzim Saraçi, ish shofer i kryebashkiakut Fatos Tushe, për të cilin ka pasur akuza që merret me trafik të lëndëve narkotike.
Vetë Tusha përfundoi në spital pas atentatit me granat, ndërsa e plagosur mbeti dhe sekretarja e tij. Pas ngjarjes familja e tij u mor në mbrojtje nga ana e Policisë.
Tushe është akuzuar dhe nga ish-kryeministri Sali Berisha se ka bashkëpunuar me anëtarë të bandës “Hakmarrja për Drejtësi”.
Përpara kandidimit për Bashkinë Lushnjë në 2019, Tushe ka shërbyer si deputet i Parlamentit për zonën e Fierit; anëtar i Partisë Socialiste, anëtar në Komisionin e Prodhimit, Tregtisë dhe Mjedisit. Po ashtu ai ka qenë kryetar i bashkisë Lushnje për vitet 2007–2009; Anëtar i Parlamentit në legjislaturën XVIII deri më 31.03.2011. Ai dha dorëheqjen sepse kandidoi për bashkinë e Lushnjës në zgjedhjet lokale të vitit 2011.
Personat e arrestuar nga operacioni i RENEA dhe FNSH janë:
Flamur Peqini ( Ish kreu i Inspektoriatit të Ndërtimit në Lushnje)
Xhemal Hasko
Blerta Turuku
Ani Simoni
Andri Mushaj
Margarita Gjermeni
Bujar Murati
Ibrahim Lami
Xhemal Hasko
Gazment Çela
