FOTO/ Shpërthimi në Velipojë, të plagosurit nga 11 në 40 vjeç në gjendje të rëndë. Detajet

Një tjetër ngjarje e rëndë është regjistruar mëngjesin e sotëm në Velipojë, ku si pasojë e një shpërthimi të një bombule gazi janë plagosur 4 persona, nga 11 në 40 vjeç, pjesëtarë të së njëjtës familjeje.

Mësohet se shpërthimi ka ndodhur rreth orës 07:05, ndërsa bombula ishte e vendosur në katin e parë të godinës 3-katëshe, e cila shërbente si hotel.

Të plagosurit, pjesëtarë të familjes Gjoka nga Lezha, mësohet se ishin pronarë të hotelit. Nuk dihen ende shkaqet që çuan në shpërthimin e bombulës, por dyshimet e para flasin për një rrjedhje gazi, e cila më pas ka shkaktuar edhe shpërthimin e fortë.

Nga raportimet të plagosurit janë Klarisa Gjoka 15 vjeç, Danjela Gjoka 18 vjeç, Enrik Gjoka 11 vjeç dhe Alketa Gjoka 40 vjeç.

Ato kanë pësuar djegie të rënda dhe gjendja e tyre shëndetësore është vlerësuar si tepër e rëndë. Nga raportimet, që i referohen stafeve mjekësore në vendin e ngjarjes, të 4 të plagosurit kanë pësuar djegie në 85-90 % të trupit, që vlerësohet një gjendje shumë shumë kritike për jetën.

LEXO EDHE  Lidhjet e Vuçiçit dhe Qeverisë serbe me mafian? DW: Një skandal i madh mafio-politik

Dy nga të plagosurit janë transportuar drejt spitaleve të Tiranës, ndërsa dy të tjerë janë në pritje të transportit me helikopter po drejt Tiranës.

“Gjendja e të lënduarve është shumë, shumë e rëndë. Djegia 85-90%. Të gjithë janë një familje, në moshën prej 11 deri në 40 vjeçe, një fëmijë dhe tri gra. Janë nga Lezha dhe kanë ardhur te hoteli që kanë në Velipojë. Janë djegur nga bombola e gazit. Mbërritëm menjëherë policia, zjarrfikësi dhe ambulanca dhe i transportuam. Dy janë në Spitalin e Shkodrës, për dy të miturit pritet helikopteri, se janë në gjendje më të rëndë”, është shprehur një prej punonjësve shëndetësorë në vendin e ngjarjes.