Kryeministri Edi Rama ka habitur me deklaratën e tij, kur tha se shkalla e kriminalitetit në vend është brenda limiteve. Ndërsa fliste për gjendjen e kriminalitetit dhe sigurisë rrugore në vend, Rama nuk u shpreh i shqetësuar, pavarësisht se theksoi se ngjarjet e fundit janë tronditëse.
“Nuk jam i shqetësuar sa i përket trendeve të kriminalitetit apo aksidenteve sepse trendet shikohen përtej një ngjarje dy tre apo katër.
Mjafton të shihni dhe do kuptoni që trendet janë brenda një limiti që përcakton edhe shkallën se si kriminaliteti apo aksidentet ulen apo rritet. Natyrisht që ngjarjet e ndodhura janë tronditëse , por për turistët mos kini merak. Atmosfera e një vendi ku turistët nuk duhet të vijnë sepse rrezikojnë të vriten rrugëve është në ekran dhe jo në realitet. Fakti tregon që turistët do të vijnë dhe po vijnë. Turistët nuk vijnë nga hëna, por nga vende iku ka edhe probleme.
Një ngjarje dy apo tre, tragjike pa diskutim nuk përcaktojnë nivelin e sigurisë apo pasigurisë në vend. Dhe të thuash që është bërë më keq sesa të kishte Covid, këtë nuk di si ta quaj. Mendoj që ne duhet të kuptojmë mirë se më çfarë lidhet dinamika e ngjarjes.
Ne nuk jemi në asnjë sekonde të kënaqur me punën tonë , të strukturave që nga puna ime apo e cilitdo qoftë që ka detyrë t’i çojë gjërat para”, tha Rama .
Reagimi i Kryeministrit vjen pasi në dy ngjarje mjaft të rënda kanë humbur jetën 8 qytetarë, 4 prej të cilëve në aksidentin tragjik në aksin Fier-Vlorë, dhe viktimat ishin nga e njëjta familje. Ndërkohë që 4 qytetarë të tjerë humbën jetën si rezultat i përplasjes me armë në Velipojë.
Por duket se 8 jetët e humbura në një hark kohor prej 48 orësh trajtohen si statistika nga Rama, i cili me deklaratën e sotme, ka habitur jo pak, kur flet për limite lidhur me gjendjen e sigurisë.
Në vijim, Rama u shpreh se Policia e Shtetit do të jetë e pranishme në të gjithë vijën bregdetare, ndërsa shtoi që subjektet të largohen nga sipërfaqet që nuk i takon me ligje dhe rregull.
“I bëj thirrje që të largohen nga sipërfaqet që nuk i takon me ligj dhe me rregull. Policia e Shtetit do të jetë e pranishme në të gjithë vijën bregdetare. Plazhet janë të qytetarëve dhe për aq sa subjektet private janë përfshirë në garantimin e sezonit turistik janë të tyre si përgjegjësi aty ku i është njohur ligjërisht”, tha Rama.
