Pjesë të ndryshme të botës, në Azi dhe në Paqësor, po zgjerojnë ose po rivendosin kufizimet prej pandemisë për shkak të valës së infektimeve nga varianti “Delta” i koronavirusit.
Varianti që u diktua në Indi fundvitin e kaluar ka alarmuar shtetet si Australia, Azia Juglindore dhe Rusia që po vërejnë një shpërthim rastesh.
Banorët e Sidneit kaluan të dielën ditën e parë të izolimit dyjavor me rregulla më strike kundër përhapjes së Covid-19, dhe me bar-kafe e restorante të mbyllura sikurse një vit më parë.
Në Zelandën e Re, rajoni i Uellingtonit e shtyu me dy ditë të tjerë regjimin antikovid; Indonezia raportoi një rekord prej 21 mijë rastesh ditore infektimi, ndërsa Tajlanda ka vendosur përsëri kufizimet për restorantet dhe tubimet.
Edhe Rusia raportoi në fundjavë një pikë kritike me pandeminë, mbi 20 mijë të prekur të rinj brenda ditës nga Sars-CoV-2.
Varianti Delta i koronavirusit është më infektues, sipas OBSH-së, dhe mbetet më shqetësuesi për mbi 85 shtete të botës.
Në Evropë dhe SHBA, ndërkaq, po hiqen shumica e kufizimeve teksa vlerësohet se programet e vaksinimit e kanë zbutur situatën.
Nga e hëna, në gjithë Italinë hyri në fuqi dekreti që nuk e bën më të detyrueshëm mbajtjen e maskave, vendim që shënon kthesën e qartë nga bilancet dramatike të vitit të shkuar.
Italia ka regjistruar më shumë se 127 mijë viktima nga Covid-19, dhe shifra po i afrohet pragut 4 milionë në nivel botëror, ku SHBA-ja prin ende me mbi 603 mijë jetë të humbura.
