Një ditë pas aksidentit tragjik që çoi në humbjen e jetës së katër anëtarëve të një familjeje në autostradën Fier-Vlorë, përdorues të automjeteve vijojnë të tregojnë papërgjegjshmëri, duke shkelur rregullat e qarkullimit rrugor.
Parakalimet e gabuara e tejkalimi i limitit të shpejtësisë janë ndër shkeljet më të shpeshta të drejtuesve të mjeteve që sjellin aksidente dhe në jo pak raste me pasoja fatale për jetën.
Në rrjetet sociale janë shpërndarë orët e fundit pamje të drejtuesve të automjeteve me sjelle agresive në rrugë që bëhen burim aksidenti, duke vënë në rrezik jo vetëm jetën e tyre, por edhe qytetarëve të tjerë që qarkullojnë, në këmbë apo me automjete.
Rregullat e qarkullimit rrugor shkelen dhe nga punonjës së institucioneve që veprojnë si rregullatorë apo ndëshkues të situatave të tilla. I tillë është rasti që sjell “BoldNews” përmes pamjeve më poshtë.
Në video duket një automjet luksoz tip “Range Rover” i Drejtorisë së Përgjithshme të Policisë që parakalon në vija të pandërprera, në shkelje të Kodit Rrugor.
Në një video tjetër duket makina e një tjetër institucioni – Kuvendit të Shqipërisë – që parakalon një autoveturë policie në krah të djathtë, në kundërshtim me rregullat e qarkullimit rrugor.
Një raport i fundit i Eurostrat, publikuar në media pak ditë më parë, e rendiste Shqipërinë ndër vendet me vdekjet më të larta nga aksidentet rrugore në raport me popullsisë dhe gati 60% më të larta sesa mesatarja europiane.