Alex Cordaz është zyrtarisht një lojtar i ri i Interit. Ish-portieri i Crotone ka nënshkruar kontratë me zikaltrit deri më 30 qershor 2022. Për të është një kthim, pasi është rritur në ekipet e të rinjve zikaltër. Pikërisht për këtë arsye, blerja e portierit në fjalë do të jetë shumë e dobishme në funksion të listës së Champions-it.
Ja deklarata e Interit me këtë rast: “FC Internazionale Milano njofton ardhjen nga Crotone të Alex Cordaz: portieri i lindur më 1983, i cili u rrit në sektorin e të rinjve zikaltër, ku në tri sezone fitoi një titull dhe një Kupë Viareggio. Ai ka nënshkruar kontratë deri më 30 qershor 2022”.
Cordaz kthehet të veshë fanellën e Interit pas 16 vitesh. Më 1999 hyri në sektorin e të rinjve zikaltër dhe menjëherë fitoi Kupën Viareggio. Më 2002 mbërriti titulli me të rinjtë, duke pasur në ekip Obafemi Martins dhe Goran Pandev, ndër të tjerë. Më 4 shkurt 2004, Cordaz luajti ndeshjen e tij të vetme zyrtare me fanellën e Interit (ekipit të parë) në gjysmëfinalen e Kupës së Italisë kundër Juventusit.
Toldo doli me të kuqe dhe në minutën e 19-të të pjesës së dytë, fanella me numrin 71 bëri debutimin. Që nga viti 2005 ka bredhur në disa skuadra të tjera: Spezia, Acireale, Pizzighettone, Treviso, Lugano, Cittadella, Gorica, Parma dhe Crotone, para se të kthehej aty ku e ka filluar, në “Appiano Gentile”.
