Presidenti serb Aleksandër Vuçiç, Kryeministri Edi Rama dhe homologu i tij maqedonas, Zoran Zaev, vijojnë agjendën e tyre në kuadër të mini-Shengenit Ballkanik, një nismë e mbështetur fort nga Vuçiç dhe Rama, por e kundërshtuar nga Albin Kurti, Kryeministri i Kosovës.
Mësohet se Vuçiç, Rama dhe Zaev, më 29 qershor, do të zhvillojnë një takim online për avancimin e shengenit Ballkanik, por do të mungojë Kryeministri i Kosovës, Albin Kurti.
Ky i fundit edhe në deklaratat publik ka kundërshtuar një nismë të tillë.
Madje Kurti në reagimet e tij është shprehur se nuk duhet ta lejojmë Jugosllavinë e katërt. Sipas tij Serbia ka pasur qëllim Jugosllavinë e 4-ët.
Ai thotë se duhet të jemi të kujdesshëm, do ndërtojmë republikën e 3-të të Kosovës.
“Serbia është e angazhuar për të krijuar një platformë të re për Serbinë madhe. Serbisë i nevojitet një platformë për t’u zgjeruar dhe Jugosllavinë e katërt nuk duhet ta lejojmë, është synimi i Serbisë.
E kanë kuptuar që në procesin e Berlinit nuk e bëjnë dot prandaj ne duhet të jemi të kujdesshëm.
Janë gabim krahasimet që janë bërë Franca me Gjermaninë dhe shqiptarët me serbët se ata i kanë rregulluar kufijtë. Kosova dhe Shqipëria duhet të bëhen si dy Gjermanitë”, ka deklaruar më parë Kurti, duke komentuar Shengenin Ballkanik.
