Një ngjarje e rëndë ka ndodhur në Miami ku një ndërtesë banimi 12-katëshe u shemb pjesërisht në veri të plazhit të enjten herët, duke lënë të paktën një person të vdekur dhe të paktën 10 të plagosur, thanë zyrtarët, raporton Reuters.
Dhjetëra njerëz u evakuuan nga ndërtesa dhe nga një hotel aty pranë, por nuk dihet se sa viktima të tjera mund të ketë pasi operacioni i kërkimit dhe shpëtimit po vazhdon ende, thanë zyrtarët.
Ndërtesa në qytetin Surfside, Florida, rreth 15 milje (24 km) në veri të Miamit në bregdetin e Atlantikut, u shemb pjesërisht rreth orës 2 të mëngjesit (06:00 GMT), për arsye të panjohura, i tha media kryetari i Surfside Charles Burkett.
“Është e vështirë të imagjinohet se si mund të ketë ndodhur kjo,” tha Burkett. “Ndërtesat nuk shemben kot”.
Policia e Miami-t ka marrë kontrollin e hetimit se pse ndërtesa u shemb. Më shumë se 80 njësi zjarrfikëse dhe shpëtimi janë angazhuar tha Departamenti i Shpëtimit nga Zjarri në Qarkun Miami-Dade në një mesazh në Twitter.
Një imazh i postuar në llogarinë e Twitter të Policisë së Miami Beach, i cili po ndihmon operacionin, tregoi një grumbull rrënojash me mbeturina që binin nga ato që kishin mbetur nga ballkonet e ndërtesës.
